ಆ ಊರಿನ ಕಡಲ ತೀರ,
ಮರಳಿ ಸೆಳೆಯುತಿದೆ ತನ್ನೆಡೆಗೆ,
ಹಾರಿ ಹೋಗಲೇ ನಾನು,
ಉರುಳಿ ಹೋಗಲೇ ನಾನು,
ನಡೆದು ಹೋಗಲೇ ನಾನು,
ತಿಳಿಯದೆ ತಡವರಿಸಿದೆ ನನ್ನ ಮನಸು...
ಎಂಥ ಸೆಳೆತವೇ ನಿನ್ನದು,
ನೀಲಿ ಕಂಗಳ ಮಿಂಚು ನಡಿಗೆಯಲಿ,
ಹಾರೋ ಹಕ್ಕಿಗಳೇ ಹುಬ್ಬು ಸೂರ್ಯಾಸ್ತದಲಿ,
ತಿಳಿಹಾಲ ಮೈಬಣ್ಣ ನಿನ್ನಲೆಯಲಿ,
ಹಸಿರ ರಾಶಿಯ ಕಂಡೆ ನಿನ್ನ ಮೈಸಿರಿಯಲಿ,
ಮತ್ತೆ ಮತ್ತೆ ಕಾಡುವೆ ಚೆಲುವೆ ಯಾರೇ ನೀನು?
ಆಳದಲಿ ಹುಡುಕಿದರು ತಿಳಿಯದಾಗಿದೆ ನಿನ್ನ ಹೆಸರು...
ಎಂಥ ಸೆಳೆತವೇ ನಿನ್ನದು,
ಮುಂಜಾವು ಮೂಡುತಿರೆ ಕೆನ್ನೆ ಕೆಂಪು,
ಮುಸ್ಸಂಜೆ ಹೊತ್ತಿನಲಿ ಮೈಯೆಲ್ಲ ತಂಪು,
ಕೊರೆವ ಚಳಿಯಲ್ಲೂ ಮೈ ಬಿಸಿಯಾಗಿಸುವೆ,
ಸುಡುವ ಬಿಸಿಲಲ್ಲೂ ಮೈ ತಂಪಾಗಿಸುವೆ,
ಹುಣ್ಣಿಮೆಯ ರಾತ್ರಿಯಲಿ ಕೂಗಿ ಕರೆಯುವೆ,
ಯಾರೆಂದು ಹೇಳಲು ನಿನಗೇನೆ ತೊಂದರೆ?
ಒಳಗೊಳಗೆ ಒಲವಾಗಿಸಿದ ಚೆಲುವೆ, ತಿಳಿದು
ನಲಿದೆನು ನಾನಿಂದು, ಪ್ರಕೃತಿ ನಿನ್ನ ಹೆಸರು||
