ಹನಿ...

ಕಾರ್ಮೋಡಗಳೇ ತುಂಬಿವೆ ನಡೆವ ದಾರಿಯಲೆಲ್ಲ,
ಕಣ್ಣ ಹನಿಗಳಾಗಿ ಒಮ್ಮೆ ಸುರಿದರೆ ಕ್ಷೇಮ,
ಒಮ್ಮೆ-ಮತ್ತೊಮ್ಮೆ ಹನಿ ಹನಿಯಾಗಿ ಸುರಿದರೆ,
ಹೇಗೆ ತಡೆಯಲು ಸಾಧ್ಯ ಮುದ್ದು ಮನಕೆ...??

ಪ್ರತಿಯೊಂದು ಹನಿಯು ಹೇಳುತಿದೆ ಒಂದೊಂದು ಕಥೆಯನು,
ಕಥೆಗಳೇ ತುಂಬಿದ ಬಾಳಲ್ಲಿ ನಗೆಯ ಮಾತೆಲ್ಲಿ,
ಹನಿಗಳೊಂದೊಂದಾಗಿ ಚದುರದೆ, ಎಲ್ಲ ಒಟ್ಟಾಗಿ
ಮಹಾ ಪ್ರವಾಹವಾಗಿ ಒಮ್ಮೆಲೆ ಬಂದಪ್ಪಿದರೆ,
ಮುಕ್ತಿಯ ಕಥೆಯೆಂದು ಮುನ್ನುಗ್ಗಿ ಹೋಗುವೆನು ಹೆಮ್ಮೆಯಿಂದ...

ಅಣುವ ಗಾತ್ರದ ಹನಿಯು ಪ್ರಳಯವನೆ ತರಬಹುದು,
ತೃಣದ ಮೇಲಿನ ಹನಿಯು ಪ್ರಾಣವನೆ ಇರಿಬಹುದು,
ಹನಿ ಹನಿಯಾಗಿ ಬಂದು ಪ್ರತಿಕ್ಷಣ ಕೊಲ್ಲದಿರು,
ಸಿದ್ಧನಿರುವೇನು ನಾ ಒಟ್ಟಾಗಿ ಬಾ, ಒಮ್ಮೆಲೇ
ಸೀಳಿಬಿಡು ನನ್ನನು, ಖುಷಿಯಾಗಿ ಸಾಯುವೆನು ಶಾಂತಿಯಿಂದ...

ಯಾರಿಗಾಗಿ..??

ಬಾಳೆಯ ತೋಟದಲಿ ಕಂಡ
ಬಾಳೆದಿಂಡಿನ ಬಾಲೆ,
ಬೆಳ್ಳಿ ಬೆಳಕಲಿ ಹೊಳೆದು
ಬಳುಕುತಿರುವೆ ನೀ ಯಾರಿಗಾಗಿ??

ಕೊಳದ ಕಮಲದೆ ಕಣ್ಣು,
ಪಳ-ಪಳನೆ ಮಿಂಚುತಿದೆ,
ಕೊಲ್ಲುವಂತಿದೆ ಕಣ್ಣಂಚಿನ ಮಿಂಚು,
ಕಣ್ಣಂಚಿನ ಸಂಚಿನಾಟವು ಯಾರಿಗಾಗಿ??

ತೊಂಡೆ ಹಣ್ಣಿನ ತುಟಿಯ,
ತಿಂದು ರುಚಿಸುವ ಬಯಕೆ,
ನೂರೊಂದು ಮುತ್ತುಗಳ ಸಾಲಾಗಿ ಜೋಡಿಸಿಹೆ,
ಸಾಲ ಮುಂದಿರುವ ಕೆಂದುಟಿಯು ಯಾರಿಗಾಗಿ??

ಶಿಲೆಯ ಒಳಗಣ ಕಲೆಯ
ಕೆತ್ತಿ ತೋರಿಸುವಂತೆ,
ನಿನ್ನಂದ ತೋರುತಿಹ ಕಲೆಯೊಡತಿ
ಶಿಲಾಬಾಲಿಕೆಯ ಭಂಗಿ ಯಾರಿಗಾಗಿ??

ಹಸಿರ ಕಾನನದಲ್ಲಿ
ಒಂಟಿ ಮರವೊಂದಕ್ಕೆ
ಅಪ್ಪಿ ನಿಂತಿರುವ ಬಳ್ಳಿ ನೀ,
ಆ ಒಲವಿನ ಅಪ್ಪುಗೆ ಯಾರಿಗಾಗಿ??

ನಲಿದಾಡುತಿರುವೆ...

ನಗುವ ಮರೆತ ಯುಗದಲಿ
ಕಾದ ಕಡಲಾಗಿದ್ದೆ ನಾನು,
ಅಂದದರಸಿಯ ಚೆಂದದ ನಗುವ ಕಂಡೆ,
ಕಾದು ಕುಳಿತಿದ್ದ ಸಮಯವ ಮರೆತು
ನಿನ್ನ ನಗೆಯಲ್ಲೇ ನಲಿದಾಡುತಿರುವೆ...||

ಕಡಲೊಡಲಿನ ಕಪ್ಪೆಚಿಪ್ಪಲಿ
ಸ್ವಾತಿ ಮಳೆಹನಿಯ ಮುತ್ತು,
ಮುತ್ತು ಮುತ್ತುಗಳೊಂದೊಂದು
ಮತ್ತೊಂದರೊಡನೆ ಬೆರೆತ
ನಗುವ ಮುತ್ತಿನ ಹಾರದಲೆ ನಲಿದಾಡುತಿರುವೆ...||

ತಿಳಿ ಹಾಲ ಕೊಳದಲ್ಲಿ,
ತಡ ಜಾವದಲಿ ಮಿಂದು
ಮಡಿಯುಡುಗೆಯಲಿ ಬಂದ
ಶ್ವೇತ ಸುಂದರಿ ನಿನ್ನ
ಹಾಲ್ಗಲ್ಲದ ನಗುವಲ್ಲೇ ನಲಿದಾಡುತಿರುವೆ...||