ಎರಡು ಮನಗಳು...

ಎರಡೇ ದಿನ ಸಾಕೆನಗೆ ನಿನ್ನ ಮನವನರಿಯಲು,
ಎರಡು ಕ್ಷಣ ಸಾಕೆನಗೆ ನಿನ್ನ ಮನವೊಲಿಸಲು,
ಎರಡು ಮಾತು ಸಾಕೆನಗೆ ನಿನ್ನ ಈ ಜಗವ ಮರೆಸಲು,
ಎರಡು ಯೋಚನೆ ಏಕೆ ಗೆಳತಿ ಒಮ್ಮೆ ಸಮ್ಮತಿಸು,
ಎರಡು ಮನಗಳು ಒಂದಾಗಲಿ ಈ ಅಮೃತ ಘಳಿಗೆಯಲಿ...

ಎರಡು ಕಣ್ಣುಗಳಲ್ಲಿ ಮೊದಲಾಯಿತು ಮೊದಲ ಪ್ರೀತಿ,
ಎರಡು ತುಟಿಗಳು ಅರಿತು, ನಿವೇದಿಸಿದವು ನಿನ್ನಲಿ,
ಎರಡು ಕಣ್ಣೀರ ಹನಿ, ಕೋಪ ಕರಗಿಸುವ ರೀತಿ,
ಎರಡು ನೀರ ಹನಿ, ಜೀವ ಉಳಿಸುವ ರೀತಿ,
ಎರಡು ಮಾತನಾಡದೆಯೆ ಒಪ್ಪಿಕೋ ನೀನು ಒಲವ ಒಡತಿ...

ಎರಡು ಹುಸಿ ಮುನಿಸು ಬರುವುದು ಪ್ರೀತಿಯಲಿ,
ಎರಡೆರಡು ಮಾತಲ್ಲಿ ಚುಚ್ಚುವರು ಜಗದಲ್ಲಿ,
ಎರಡೇ ದಿನದ ಮುನಿಸು ಅರ್ಥವಾಗದೆ ನಿನಗೆ?
ಎರಡು ಸುಳ್ಳಾಡಲು ನೀನು ಎರಡು ದಿನದ ಕೋಪ ನನಗೆ,
ಎರಡಕ್ಷರದ ಪ್ರೀತಿ ಎಂದಿಗೂ ಸುಳ್ಳಲ್ಲ ಗೆಳತಿ,
ಜಗವೇ ಎರಡಾದರೂ, ಜೀವದಾಕಾರ ಅಳಿದರೂ,
ಗಾಳಿಯಲಿ ಬೆರೆತ ಉಸಿರಲ್ಲೇ ಪ್ರೀತಿಸುವೆ ನಿನ್ನ ನಾನು....

ಹನಿ...

ಮೊದಲ ಮಳೆಯ ಮೊದಲ ಹನಿಯೇ,
ಕೆನ್ನೆ ಮೇಲೆ ಕ್ಷಣವು ಹೊಳೆದು,
ಮನದ ಆಳಕೆ ಮೆಲ್ಲನಿಳಿದು,
ತೊದಲ ಪ್ರೀತಿಗೆ ಹುಟ್ಟು ನೀಡಿದೆಯಲ್ಲೇ,
ವಿವರಣೆಯನಾರು ಹೇಳ್ವರು ನನ್ನ ಪುಟ್ಟ ಮನಸಿಗೆ...

ಮನದೆ ಇಳಿದ ಮೊದಲ ಹನಿಯೇ,
ಮೊಳೆತ ಜೀವಕೆ ಉಸಿರ ನೀಡು,
ಉಸಿರಿಗೊಂದು ಹೆಸರ ಹೇಳು,
ಹೊಸ ಭಾವದ ಪಿಸು ಮಾತಿಗೆ,
ಸೋತಿರುವುದು ನನ್ನೆದೆಯು,
ಹೆಸರಿನ ಗಾಢಾರ್ಥ ಹೇಳು ನನ್ನ ಪುಟ್ಟ ಮನಸಿಗೆ...

ನಿನ್ನ ತುಟಿಯ ಜೇನ ಹನಿಯು,
ಸವಿಯುವಾಸೆ ಹಗಲಿರುಳು,
ಸೋತ ಎದೆಗೆ ಸ್ವಂತವಾಗಿ,
ಚಿಂತೆ-ಸಂತೆ ದೂರ ಮಾಡಿ,
ಅಂತರಾಳದೊಲವಿನಿಂದ,
ಮಧುವನದಲಿ ಮಧು ಉಣಿಸು ನನ್ನ ಪುಟ್ಟ ಮನಸಿಗೆ...

ಪ್ರೀತಿಯ ಓಲೆ...

ನಿನ್ನ ಮೊಗ ನೋಡಲಾರೆನು ನಾನು,
ದೂರವಿರು ನನ್ನಿಂದ...
ಕರಗಿ ಕೆಳಗಿಳಿಯೇ ಕಂಗಳಂಚಿಂದ
ಕಣ್ಣೀರ ಹನಿಯಾಗಿ ಮನದಾಳದಿಂದ....

ಕಣ್ಣ ಮುಚ್ಚಲು ನಾನು,
ನನ್ನೆದರು ನೀನು,
ಬೇಡವೆಂದೆಷ್ಟು ಸಲ ದೂಡಲಿ ನಿನ್ನ,
ಬೇಡನಂತೇಕೆ ಬೇಟೆಯಾಡುವೆ ನನ್ನ,
ಬೇಡಿಕೊಂಡರು ಕರುಣೆಬಾರದೆ ನಿನಗೆ???
ಬಿಡುಗಡೆಯ ನೀಡೆನಗೆ ಚೆಲುವೆ,
ನಿನ್ನ ಮೋಹ ಜಾಲದ ವ್ಯೂಹದಿಂದ....

ನೊಂದು ಬೆಂದಿರುವೆ ನಾನು,
ಇಂದು ನಾಳೆಗಳ ಅರಿವಿಲ್ಲದೆ,
ಒಂದುಸಲವಾದರು ಹೇಳು ಪ್ರೀತಿಯಲಿ,
"ನೀ ನನಗೆ ಇಷ್ಟ"ವೆಂದು.....
ಅಷ್ಟೇ ಸಾಕೆನ್ನ ಪುಟ್ಟ ಹೃದಯಕೆ,
ಎಷ್ಟೇ ಜನುಮಗಳೆ ಸಾಗಲಿ,
ಕಾಯುವೆನು ನಿನಗಾಗಿ ತೆರೆದ ಮನಸಿಂದ,
ಸೇರಿಕೊಳ್ಳವೆ ನಿನ್ನ ಮುಗ್ದ ಪ್ರೇಮದಿಂದ...

ಪ್ರಕೃತಿ...

ಆ ಊರಿನ ಕಡಲ ತೀರ,
ಮರಳಿ ಸೆಳೆಯುತಿದೆ ತನ್ನೆಡೆಗೆ,
ಹಾರಿ ಹೋಗಲೇ ನಾನು,
ಉರುಳಿ ಹೋಗಲೇ ನಾನು,
ನಡೆದು ಹೋಗಲೇ ನಾನು,
ತಿಳಿಯದೆ ತಡವರಿಸಿದೆ ನನ್ನ ಮನಸು...

ಎಂಥ ಸೆಳೆತವೇ ನಿನ್ನದು,
ನೀಲಿ ಕಂಗಳ ಮಿಂಚು ನಡಿಗೆಯಲಿ,
ಹಾರೋ ಹಕ್ಕಿಗಳೇ ಹುಬ್ಬು ಸೂರ್ಯಾಸ್ತದಲಿ,
ತಿಳಿಹಾಲ ಮೈಬಣ್ಣ ನಿನ್ನಲೆಯಲಿ,
ಹಸಿರ ರಾಶಿಯ ಕಂಡೆ ನಿನ್ನ ಮೈಸಿರಿಯಲಿ,
ಮತ್ತೆ ಮತ್ತೆ ಕಾಡುವೆ ಚೆಲುವೆ ಯಾರೇ ನೀನು?
ಆಳದಲಿ ಹುಡುಕಿದರು ತಿಳಿಯದಾಗಿದೆ ನಿನ್ನ ಹೆಸರು...

ಎಂಥ ಸೆಳೆತವೇ ನಿನ್ನದು,
ಮುಂಜಾವು ಮೂಡುತಿರೆ ಕೆನ್ನೆ ಕೆಂಪು,
ಮುಸ್ಸಂಜೆ ಹೊತ್ತಿನಲಿ ಮೈಯೆಲ್ಲ ತಂಪು,
ಕೊರೆವ ಚಳಿಯಲ್ಲೂ ಮೈ ಬಿಸಿಯಾಗಿಸುವೆ,
ಸುಡುವ ಬಿಸಿಲಲ್ಲೂ ಮೈ ತಂಪಾಗಿಸುವೆ,
ಹುಣ್ಣಿಮೆಯ ರಾತ್ರಿಯಲಿ ಕೂಗಿ ಕರೆಯುವೆ,
ಯಾರೆಂದು ಹೇಳಲು ನಿನಗೇನೆ ತೊಂದರೆ?
ಒಳಗೊಳಗೆ ಒಲವಾಗಿಸಿದ ಚೆಲುವೆ, ತಿಳಿದು
ನಲಿದೆನು ನಾನಿಂದು, ಪ್ರಕೃತಿ ನಿನ್ನ ಹೆಸರು||

ಸುಳಿ...

ಸುಳಿದಾಡದಿರು ಗೆಳತಿ ಎನ್ನೆದೆಯ ಅಂಗಳದಲಿ,
ಸುಳಿವು ನೀಡದೆಯೆ ಬಂದು ಸೇರಿದೆ ನನ್ನೊಳಗೆ,
ಸುಳಿಯೊಳಗೆ ಸಿಲುಕಿಸಿಯೇಕೆ ದೂರ ಸರಿದೆ???

ಸೆಳೆವೆ ಕಣ್ಣುಗಳೆರಡು ಆ ನಿನ್ನ ಮೊಗದಲಿ,
ಹೊಳೆವ ಕಣ್-ಕಾಂತಿಯನೇನೆಂದು ಬಣ್ಣಿಸಲಿ,
ಮಳೆ, ಮಿಂಚು ಸಿಡಿಲುಗಳೆಲ್ಲ ಆ ಕಣ್ಣುಗಳಂಚಿನಲಿ,
ಇಳೆಗಿಳಿದು ಪ್ರೀತಿಸಿದೆ ಆ ಜೋಡಿ ಕಂಗಳಿಗಾಗಿ,
ಸುಳಿಯೊಳಗೆ ಸಿಲುಕಿಸಿಯೇಕೆ ದೂರ ಸರಿದೆ????

ಹಲವಾರು ದಿನರಾತ್ರಿಗಳ ಕನಸಿನಲಿ,
ಒಲವ ಪ್ರತಿಮೆಯನಿಟ್ಟು ಮನದ ಗುಡಿಯಲಿ,
ನಲಿವ ದುಂಡು ಮಲ್ಲಿಗೆಯ ಹೂಗಳಲಿ,
ಅರ್ಚಿಸಿ ಪೂಜಿಸಿದೆ ಗೆಳತಿ ನಿನ್ನ ಪ್ರತಿಮೆಯನು,
ಸುಳಿಯೊಳಗೆ ಸಿಲುಕಿಸಿಯೇಕೆ ದೂರ ಸರಿದೆ????

ಕನ್ನಡತಿ....

ಕರುಣದಲಿ ನೋಡೆ ಕಮಲನಯನೆ,
ಕರುನಾಡ ಕನ್ನಡ ಕುವರ ನಾನಿರುವೆ,
ಹೊರನಾಡ ಹೊಲಸು ಹಂದಿಗಳೇಕೆ ನಿನಗೆ,
ಚರಣದಾಸಿಯಾಗಬೇಕಿಲ್ಲ ನನಗೆ, ಹರುಷದಿಂದಲಿ ಪ್ರೀತಿಯ
ಹೂರಣವ ಉಣಿಸಿದರೆ ಸಾಕು ಮುದ್ದು ಮನಕೆ...

ಬೆಳ್ಳನೆಯದೆಲ್ಲಾ ಎಂದಿಗೂ ಹಾಲಲ್ಲ.
ಬೆಳ್ಳಗೇ ಬೆಳಗುವುದು ತಿಳಿಯ ಸುಣ್ಣದ ನೀರು,
ಬೆಳ್ಳಿ ಬೆಳಕಿನ ಚಂದ್ರ ಕಡುಗತ್ತಲಲೇ
ಹೊಳೆಯುವನು, ಹಾಲ ಶರಧಿಯಲಿ ಅದು ಬರಿಯ ಬಿಂಬ,
ಬೆಣ್ಣೆ ಸುಣ್ಣದ ಅಂತರ ಅರಿತರೆ ಸಾಕು ಮುದ್ದು ಮನಕೆ...

ಕಡುಕಪ್ಪು ಬಣ್ಣವೇ ಕಠಿಣ ವಜ್ರದ್ದು,
ಕಡೆದು ತೀಡಿದಮೇಲೆ ಆಳದಲಿ ಸಿಗುವುದು,
ಕಡೆಗಣಿಸದಿರು ಕಪ್ಪೆಂದು ನನ್ನ,
ಕಡೆಗಳಿಯವರೆಗೂ ಕೊಡೆಯಡಿಯಲಿ ನಿನ್ನ
ಕೈಹಿಡಿದು ನಡೆಸುವೆ ಓ ಕನ್ನಡದ ಹೆಣ್ಣೇ,
ಕನ್ನಡವೇ ನನ್ನುಸಿರು ಕರುನಾಡು ಕಲ್ಪತರು,
ಇಚ್ಛೆಯಿಂದಲಿ ಸ್ವಚ್ಚ ಕನ್ನಡತಿ ನೀನಾದರೆ ಸಾಕು ಮುದ್ದು ಮನಕೆ...

ನಿನ್ನೇ ಪ್ರೀತಿಸುವೆ...

ಸಹ್ಯಾದ್ರಿ ಸಾಲಿನ ಮಧ್ಯದಲಿ,
ಬೆಳ್ಳಿ ಮೋಡಗಳ ತೇರಿನಲಿ,
ಶರಾವತಿಯ ನಿಶ್ಯಬ್ದ ರಾಗದಲಿ,
ಬಿಗಿದಪ್ಪಿ ಹೇಳುವೆ ನಿನ್ನೆ ಪ್ರೀತಿಸುವೆ ಎಂದು
ಹಣೆಗೊಂದು ಮುತ್ತನಿಟ್ಟು..||

ಹಚ್ಚ ಹಸಿರಿನ ವನ ರಾಶಿಯಲಿ,
ನೀಲಾಕಾಶದ ಚಪ್ಪರದ ಅಡಿಯಲಿ,
ಹಕ್ಕಿಗಳ ತಾಳವಾಧ್ಯದಲಿ,
ಕೈ ಹಿಡಿದು ಹೇಳುವೆ ನೀ ನನ್ನವಳೆ ಎಂದು
ಹೂ ಮುಡಿಸಿ, ಕೆನ್ನೆಗೆ ಅರಿಶಿನವ ಹಚ್ಚಿ,
ಹಣೆಗೆ ಮಂಗಳ ಸಿಂಧೂರವನಿಟ್ಟು...||

ಹಾಲ ಬೆಳದಿಂಗಳಿರುಳಲಿ,
ಪ್ರೇಮ ಶರಧಿಯಲೆಗಳ ಏರಿಳಿತದಲಿ,
ಉಸಿರು ಬಿಸಿಯುಸಿರ ಸೇರುವಾ ಕ್ಷಣದಲಿ,
ಕಿವಿಯಲ್ಲಿ ಪಿಸುಗುಡುವೆ ಈ ಹುಟ್ಟು ನನಗಾಗಿ ಎಂದು
ತುಟಿಮೇಲೆ ತುಟಿಯನಿಟ್ಟು,
ಮನಸೊಳಗೆ ಮನಸನಿಟ್ಟು...||

ಗರ್ವ....

ಮಾಯವಾಗಿದೆ ಕಿರುನಗೆ ಮೊಗದ ಅಂಗಳದಿಂದ,
ಮರೆಯಾಗುತಿದೆ ಒಲುಮೆ ಮನಕೆ ಒಲಿದವರಿಂದ,
ನಲಿಯುತಿದೆ ದೂರದಲ್ಲೊಂದು ಒಂಟಿ ತಾರೆ
ನನ್ನಂತೆಯೇ ನೀನು, ಸನಿಹ ಕಾಣ್ವರು ಆಪ್ತರು
ಕೋಟಿ ಮೈಲುಗಳ ದೂರದಿಂದ,
ಕಾಲನೆ ನೀನೆಷ್ಟು ಕ್ರೂರ...???

ಉರುಳುತಿದೆ ಕಾಲ ನಾಳೆಯ ಬಳಿಗೆ,
ಹೊರಳುತಿದೆ ಮನ ಬಾಧ್ಯತೆಗಳೆಡೆಗೆ,
ಅರಳುತಿದೆ ಪ್ರೀತಿ ನವಜೀವದೆಡೆಗೆ,
ಪಾತಾಳವೇತಕೆ ಸೇರಿತು ಮೈತ್ರಿ?
ಬಯಸಿಯೋ, ಬಯಸದೆಯೋ ಬಂದ
ಬದಲಾವಣೆಗಳಿಂದ,
ಕಾಲನೆ ನೀನೆಷ್ಟು ಕ್ರೂರ...???

ನನ್ನದೆನ್ನುವ ಭಾವ ನಿನ್ನಲ್ಲಿ ನುಗ್ಗಿರಲು,
ನನ್ನ ನೋವನು ನಾನು ಯಾರಲ್ಲಿ ಬಿಚ್ಚಿಡಲಿ?
ನನ್ನ ನಲಿವನು ನಾನು ಯಾರ ಜೊತೆ ಹಂಚಲಿ?
ನನ್ನ ನಲ್ಮೆಯ ಜೀವ, ನನ್ನೊಡನೆ ನೀನಿರಲು,
ನರರಧಿಪತಿ ನಾರಾಯಣನೆ ಮುಂಬರಲು,
ನೇರ ನೋಟವ ಭಿತ್ತಿ, ಮುಳ್ಳಿನ ಹಾದಿಯಲು
ಮೆಟ್ಟಿ ನಡೆಯವೆ ನಾನು ಗರ್ವದಿಂದ...

ಮಿಲನ...

ಅನವರತ ಅನುಸರಿಸಿ,
ಉಸಿರೆಲ್ಲ ಉಣಬಡಿಸಿ,
ಕನಸಲ್ಲೇ ಕನವರಿಸಿ,
ಮುದುಡಿದ್ದ ಮನತಣಿಸಿ,
ನಿನ್ನ ಹಿಂದೆ ಬಂದೆ ಗೆಳತಿ.....

ನೆನಪುಗಳು ನಳನಳಿಸಿ,
ನೆನಪಲ್ಲೇ ನನ್ನಳಿಸಿ,
ನೆನಪಾಗಿ ನಿನ್ನುಳಿಸಿ,
ಮರುಗಿದ್ದ ಮನಸವೆಸಿ,
ನಿನಗಾಗಿ ಕಾದೆ ಗೆಳತಿ.....

ನಿನ್ನಾಸೆ ನಿಗ್ರಹಿಸಿ,
ಒಲವನ್ನು ಒಳಗಿಳಿಸಿ,
ಹೃದಯದಲಿ ಹನಿಸುರಿಸಿ,
ತಂಗಾಳಿ ತಂಪುಣಿಸಿ,
ತಡೆಹಿಡಿದ ಆಸೆಗಳ ಚೆಲುವಿಂದ ಚಿಮ್ಮಿಸುತ,
ನನ್ನ ಹೃದಯ ಸೇರೆ ಗೆಳತಿ...

ಕಳೆದೆ ಕಳೆದಿರುಳ...

ಕಳೆದೆ ಕಳೆದಿರುಳ
ಕನಸಲಿ ಕಂಡ
ಕಮಲನಯನೆಯ
ಕರಕಮಲಗಳಲ್ಲಿ....

ಕಳೆದ ಕ್ಷಣವನೆ ಕನವರಿಸಿ
ಕಾಲಾಂತರಾಳದಲಿ
ಕರಗಿ ಕಾದಿರುವೆ ನಾ...
ಕೊರಳಂಚಿನವರೆಗು
ಕೋಪವನು ಕೆರಳಿಸದೆ
ಕಷ್ಟವಾದರೂ ಸರಿಯೇ
ಕಣ್ಣೆದುರು ನಿಲ್ಲೆ ಗೆಳತಿ...

ಕಹಿಯ ಕಲ್ಪನೆಗಳೆಲ್ಲ
ಕೊಸರಲ್ಲು ಇರದಿರಲಿ
ಕಣ್ಣ ನೇರದ ನೋಟ
ಕಳಶದ ಕಡೆಯಿರಲಿ,
ಕನಸ ಕನ್ನಿಕೆಯೆಂದು
ಕಣ್ಣೆದುರು ನಿಲ್ಲುವಳೆಂದು
ಕಾತರದಿ ಕಾದಿವುವೆ,
ಕೇಳೆ ಗೆಳತಿ ನಾ ಕಲ್ಪನಾವಿಹಾರಿ.... :)

ಹೊಸತು...

ಹೊಸತಲ್ಲಿ ಮಾತ್ರವೆ
ಹೊಸದು ಎಲ್ಲವು...
ಏನಾದರಾಗಲಿ
ಯಾವುದಾದರು ಇರಲಿ,
ಹೊಸತಲ್ಲಿ ಮಾತ್ರವೇ
ಹೊಸದು ಈ ಜಗದಲ್ಲಿ...

ಹೊಸತು ಗೆಳೆತನವಿಂದು,
ಹಳಸಿ ಹಳತಾಗುವುದು ಮರುಕ್ಷಣ...

ಹೊಸತು ಪ್ರೇಮವು ಇಂದು,
ಮನಸವೆಸಿ ಹಳತಾಗುವುದು ಮರುಘಳಿಗೆ...

ಹೊಸತು ವಿವಾಹವು ಇಂದು,
ಬೆವರ್ಹರಿಸಿ ಹಳತಾಗುವುದು ಮರುದಿನ...

ಹೊಸತು ವಸ್ತುವು ಇಂದು,
ಮಾಸಿ ಹಳತಾಗುವುದು ನಾಳೆ...

ಇಂದಿನ ಎಲ್ಲ ಹೊಸತುಗಳು,
ಮುಂದೊಮ್ಮೆ ಹಳತುಗಳೇ...
ಇಂದು ಮುಂದಿನ ನಡುವೆ
ಮಂದಗತಿಯಲಿ ಚಲನೆ...
ಒಂದೇ ದಿನದಲಿ ಎಲ್ಲವನು ಬಯಸಿ,
ಬೆಂದು ಬರಡಾಗದಿರು,
ಹೊಸತ ಅರಸಿರುವ
ನವ ಕಲ್ಪನಾವಿಹಾರಿ... ||

ಹೊಂಬೆಳಕು...

ಅರಳುತಿದೆ ಮನದ ಮೂಲೆಯಲಿ
ಚಿಗುರೊಡೆದ ಸುಂದರ ಕನಸೊಂದು...
ಮರಳುಗಾಡಾದರು ನಿನ್ನ ನೆಲೆ,
ನನ್ನ ಕನಸಿಗೆ ನಿನ್ನ ಪ್ರೀತಿ, ಸಿಹಿನೀರಿನ ಸೆಲೆ..

ಎತ್ತ ನೋಡಲು ನಾನು
ಸುತ್ತಲೂ ನಿನ್ನದೆ ಛಾಯೆ,
ಮತ್ತಾಗಿಸುವುದಾದರು ನಿನ್ನ ಗುಣ,
ಮುತ್ತನುಣಿಸಿದೆ ಮುದ್ದು ಮನಕೆ...

ಚಿತ್ತ ಚಾಂಚಲ್ಯದಲಿ
ಭಿತ್ತಿ-ಹೊತ್ತಗೆಯಲ್ಲಿ
ಹೊತ್ತು ಮುಳುಗಿದರೂ
ನೆತ್ತಿ ನೇರಕಿರುವೆ ನೀ ಹೊಂಬೆಳಕಂತೆ...

ಸುಂದರಾಂಗಿ...

ಮುಗಿಲೊಂದು ಬಾನಿನಲಿ,
ತನಗ್ಯಾರು ಮಿಗಿಲೆಂದು
ಮೊಗದಲ್ಲಿ ನಗೆ ಹರಿಸಿರಲು,
ಇಂದ್ರಧನಸಿನ ಮೇಲಿಂದ  ಧರೆಗಿಳಿದೆ
ಸುರಗಂಗೆ ನೀನು ಸುಂದರಾಂಗಿ...

ಮರಳು ಹರಳಾಗಿ
ಥರ-ಥರದೆ ಹೊರಳಾಡಿ
ಚಿತ್ತಾರ ಬಿಡಿಸಿರೆ ಮರಳುಗಾಡಲಿ,
ಹರಳೆಂಬ ಮರಳನ್ನ ಹಿಡಿ-ಹಿಡಿದು
ಪೋಣಿಸಲು, ನೀನಾದೆ ಸುಂದರಾಂಗಿ.  


ಜೀವವಾಯುವ ಹರಿಸಿ,
ನೋವ ತನ್ನಲೆ ಇರಿಸಿ,
ಕಾವ ಕರದಲೆ ಉಳಿಸಿ,
ತಂಪನುಣಿಸುವ ಬಳ್ಳಿ ಬಡವಾಯ್ತು
ನಡೆದಾಡುವ ಬಳ್ಳಿ ನೀ ಸುಂದರಾಂಗಿ...

ಉತ್ತರದ ಕಡೆಯಿಂದ
ಎತ್ತರದ ನಾಡಿಂದ
ಬಿತ್ತರದ ಹಾದಿಯಲಿ
ನೆತ್ತರತ್ತಿತ್ತ ಚಿಮ್ಮಿಸಿ ಬರುತಿರಲು ನಾ,
ಕಂಡ ಬೆಳದಿಂಗಳೆ ನೀನಲ್ಲವೇ ಸುಂದರಾಂಗಿ???

ಸಪ್ತ ಸಾಗರಗಳೆಲ್ಲ
ಒಟ್ಟಾಗಿ ಸೇರಿದರು,
ಸುತ್ತ ಎತ್ತೆತ್ತಲೋ
ಸ್ವತ್ತು ಕರಗಿಸಿ ಹುಡುಕಿದರು
ಸಿಗದ ಸೌಂದರ್ಯ ನಿನ್ನದು ಸುರ ಸುಂದರಾಂಗಿ...

ಯಾರಿಗಾಗಿ..??

ಬಾಳೆಯ ತೋಟದಲಿ ಕಂಡ
ಬಾಳೆದಿಂಡಿನ ಬಾಲೆ,
ಬೆಳ್ಳಿ ಬೆಳಕಲಿ ಹೊಳೆದು
ಬಳುಕುತಿರುವೆ ನೀ ಯಾರಿಗಾಗಿ??

ಕೊಳದ ಕಮಲದೆ ಕಣ್ಣು,
ಪಳ-ಪಳನೆ ಮಿಂಚುತಿದೆ,
ಕೊಲ್ಲುವಂತಿದೆ ಕಣ್ಣಂಚಿನ ಮಿಂಚು,
ಕಣ್ಣಂಚಿನ ಸಂಚಿನಾಟವು ಯಾರಿಗಾಗಿ??

ತೊಂಡೆ ಹಣ್ಣಿನ ತುಟಿಯ,
ತಿಂದು ರುಚಿಸುವ ಬಯಕೆ,
ನೂರೊಂದು ಮುತ್ತುಗಳ ಸಾಲಾಗಿ ಜೋಡಿಸಿಹೆ,
ಸಾಲ ಮುಂದಿರುವ ಕೆಂದುಟಿಯು ಯಾರಿಗಾಗಿ??

ಶಿಲೆಯ ಒಳಗಣ ಕಲೆಯ
ಕೆತ್ತಿ ತೋರಿಸುವಂತೆ,
ನಿನ್ನಂದ ತೋರುತಿಹ ಕಲೆಯೊಡತಿ
ಶಿಲಾಬಾಲಿಕೆಯ ಭಂಗಿ ಯಾರಿಗಾಗಿ??

ಹಸಿರ ಕಾನನದಲ್ಲಿ
ಒಂಟಿ ಮರವೊಂದಕ್ಕೆ
ಅಪ್ಪಿ ನಿಂತಿರುವ ಬಳ್ಳಿ ನೀ,
ಆ ಒಲವಿನ ಅಪ್ಪುಗೆ ಯಾರಿಗಾಗಿ??

ನೋಡಬೇಕೆನಿಸಿದೆ...

ಕನಸೆಂಬ ಊರಲ್ಲಿ,
ಕನವರಿಸಿದ ಮನದಲ್ಲಿ,
ಮಿನುಗುತಿಹ ತಾರೆ ನೀನು,
ಕಣ್ಮುಂದೆ ಬಾರೆ ಗೆಳತಿ||

ಕನಸಲ್ಲೇ ನೋಡಿ ನೋಡಿ,
ಕಹಿನೆನಪು ಮೂಡಿ,
ಮನಸಿಂದು ಬಾಡಿದೆ,
ಕಣ್ಮುಂದೆ ಬಾರೆ ಗೆಳತಿ||

ಮುದ್ದು ಮಲ್ಲಿಗೆ ಹೂವೆ,
ಮನದಲ್ಲೆಲ್ಲಾ ಬರಿ ನೋವೆ,
ಮರೆತರು ಮರೆಯಲಾರೆ ನಿನ್ನ,
ಕಣ್ಮುಂದೆ ಬಾರೆ ಗೆಳತಿ||

ಮರಳುಗಾಡಲಿ ಇನ್ನು,
ಬೇಯಲಾರೆನು ನಾನು,
ನೋಡಬೇಕೆನಿಸಿದೆ ನಿನ್ನ,
ಕಣ್ಮುಂದೆ ಬಾರೆ ಗೆಳತಿ||

ಉಸಿರು...

ಬೆಳದಿಂಗಳಿರುಳಲ್ಲಿ, ಬೆಳ್ಳಿ ಮೋಡದ ಅಂಚಿನಲ್ಲಿ|
ತೆಳುಗಾಳಿ ಸುಳಿದಿರಲು ಹಿತವಾದ ಧರಣಿಯಲಿ||
ತಿಳಿ ಹಾಲ ಸಾಗರದಿ ಏರಿಳಿವ ಅಲೆ ಅಲೆಯಲಿ|
ನಿನ್ನೊಲುಮೆಯ ಸವಿಯ ಸವಿದೆ ಗೆಳತಿ..||

ಹುಚ್ಚು ಹಿಡಿಸುವ ಆ ನಿನ್ನ ಕಣ್ಣುಗಳು|
ಕಿಚ್ಚು ಹೊತ್ತಿಸಿದೆ ಮನದ ಮನೆಯೊಳಗೆ||
ಕೊಚ್ಚಿ ಹಾಕಿದೆ ಇನ್ನೋರ್ವ ಬಾಲೆಯ ಬಯಕೆ,
ಹಚ್ಚ ಹಸಿರನೆ ತೊಟ್ಟ ಬೆಡಗಿ|
ನಿನ್ನೊಲುಮೆಯ ಬಯಸಿ ಕಾದಿರುವೆ ಬಾರೆ ಗೆಳತಿ..||

ಮನದಾಳಾದೊಳಗೆ, ಅಡಿಯಿಂದ ಮುಡಿವರೆಗೆ|
ಕಣ್ಣೀರ ತೆರೆಯೊಳಗೆ, ಎದೆ ಬಡಿವವರೆಗೆ||
ನುಡಿಮುತ್ತಿನೊಳಗೆ, ಉಸಿರಿರುವವರೆಗೆ|
ನಿನ್ ಹೆಸರ ಬಿಗಿದಿಡುವೆ ಓ ಪ್ರೀತಿ!! ನೀ ನನ್ನ ಒಡತಿ...||

ನಲ್ಲೆ...

ಇಲ್ಲೆ ಎಲ್ಲೊ ಇರುವೆ ನೀನು,
ಒಲ್ಲೆ ಎಂದ ಬಡವ ನಾನು,
ಎಲ್ಲೆ ಇರದ ಪ್ರೀತಿಯನ್ನು
ನಲ್ಲೆಯಾಗಿ ತಂದೆ ನೀನು,
ಒಮ್ಮೆಯಾದರೂನೂ ಮತ್ತೆ ನೀನು ಎದುರು ಬಾರೆಲೆ....

ಬೆಲ್ಲದಂತ ನಿನ್ನ ಮನದೆ,
ಬಳ್ಳಿಯಂತ ಪ್ರೀತಿ ಬರೆದೆ,
ಕಲ್ಲಿನಂತೆ ಕಠಿಣನಾದೆ,
ಎಲ್ಲಿ ಹೋದೆ ಗೆಳತಿ ನೀನು ನನಗೆ ಹೇಳದೆ,
ಒಮ್ಮೆಯಾದರೂನೂ ಮತ್ತೆ ನೀನು ಎದುರು ಬಾರೆಲೆ....

ಅಲ್ಲಿ ಇಲ್ಲಿ ಅಲೆವ ಮನವ,
ಇಲ್ಲೇ ತಡೆದು ಹಿಡಿದೆ ನಾನು,
ಕಳ್ಳನಾಗಿ ನಿಲ್ಲಲಾರೆ
ಮಳ್ಳ ಮನವ ಉಳಿಸಲಾರೆ
ಚೆಲ್ಲಿ ನಿನ್ನ ಮುಗ್ದ ನಗುವ,
ಒಮ್ಮೆಯಾದರೂನೂ ಮತ್ತೆ ನೀನು ಎದುರು ಬಾರೆಲೆ....

ನೀನೆ...

ನಿರಾಭರಣ ಸುಂದರಿಯೆ,
ನಿರ್ವಸ್ತ್ರ ಧಾರಿಣಿಯೆ,
ನಿರುಪಮ ಚೆಲುವೆಯೆ,
ನಿರ್ಜೀವವಾಗುತಿಹೆ ಜೀವ ಉಳಿಸೆ...

ಅಸಮಾನ ಸುಮತಿಯೆ,
ಅನುಪಮ ವಾಚಾಳಿಯೆ,
ಅನಿಯತ ಕೌಮಾರಿಯೆ,
ಅನವರತ ನೆನೆಯುತಿಹೆ ನನ್ನ ಉಳಿಸೆ...

ಸುರಲೋಕ ಬಾಲಿಕೆಯೆ,
ಸರ್ವಗುಣ ಸಂಪನ್ನೆ,
ಸುಪ್ತಮತಿ ಶ್ರೀಮತಿಯೆ,
ಸರ್ವಸ್ವ ನೀನಾಗಿರುವೆ ಬಂದು ಉಳಿಸೆ...

ಚುಕ್ಕಿ...

ಕತ್ತಲೆ ರಾತ್ರಿಯಲಿ,
ಮೆತ್ತನೆ ಸುಳಿದಾಡಿದೆ ಗೆಳತಿ,
ಹೊತ್ತು ಮುಳುಗಿದರೂ,
ಮತ್ತೆ ಮತ್ತೇಕೆ ಮಿನುಗುವೆ ನೀ ಚುಕ್ಕಿಯಂತೆ...

ಬೆತ್ತಲೆ ಬಾನಿನಲಿ,
ಎತ್ತ ನೋಡಲೇ ಗೆಳತಿ?
ಕತ್ತು ಬಾಗದು ಕೆಳಗೆ ಹೊತ್ತು ಹತ್ತಾದರೂ,
ಮತ್ತೆ ಮತ್ತೇಕೆ ಮಿನುಗುವೆ ನೀ ಚುಕ್ಕಿಯಂತೆ...

ಕಿತ್ತಳೆ ತೋಟದಲಿ,
ಸುತ್ತ ಅಲೆದಾಡಿದೆ ಗೆಳತಿ,
ಚಿತ್ತಾರ ಬಿಡಿಸಿದ್ದೆ ನೀ ನನ್ನ ನೆತ್ತಿ ಮೇಲೆ,
ಮತ್ತೆ ಮತ್ತೇಕೆ ಮಿನುಗುವೆ ನೀ ಚುಕ್ಕಿಯಂತೆ...

ಹುಸಿಯಾದೆ ನೀನು...

ನೀರಲೆಯ ನೊರೆ ಮೇಲೆ ಮೆಲ್ಲ-ಮೆಲ್ಲನೆ ನಡೆವೆ,
ನೂರಾರು ಸಾಲುಗಳ ಒಂದೇ ಮಾತಲಿ ನುಡಿವೆ,
ಇನ್ಯಾರು ಬಂದರು ನಮಗಿಲ್ಲ ಇಂದು-ನಾಳೆಯ ಗೊಡವೆ,
ಕಣ್ಣೀರು ಸುರಿಸದಿರು ಉಳಿಸು ನನ್ನ, ಓ ಒಲವೆ,
ಹುಸಿಯಾದರೂ ನೀನು ಗೆಳತಿ, ಹಸಿ ಪ್ರೀತಿಯನೆ ನಾನು ಕೊಡುವೆ.

ಊರೆಲ್ಲ ಅಲೆದರು, ಮನದಲ್ಲಿ ನಿನ್ನ ಜಪ ಒಲವೆ,
ಕರೆಯಲ್ಲೂ ನೀನಿರುವೆ, ಕಾರಣವು ನಿನ್ನ ನಡುವೆ?
ಕೊರಳಲ್ಲೆ ಉಳಿದಿರುವೆ, ಕೋಪವಿರುವುದೆ ನಮ್ಮ ನಡುವೆ?
ಕರುಣೆಯಲೆ ಕನಿಕರಿಸೇ, ಮನದಾಳದಿಂದ ನಿನ್ನ ಕರೆವೆ,
ಹುಸಿಯಾದರೂ ನೀನು ಗೆಳತಿ, ಹಸಿ ಪ್ರೀತಿಯನೆ ನಾನು ಕೊಡುವೆ.