ಸಹ್ಯಾದ್ರಿ ಸಾಲಿನ ಮಧ್ಯದಲಿ,
ಬೆಳ್ಳಿ ಮೋಡಗಳ ತೇರಿನಲಿ,
ಶರಾವತಿಯ ನಿಶ್ಯಬ್ದ ರಾಗದಲಿ,
ಬಿಗಿದಪ್ಪಿ ಹೇಳುವೆ ನಿನ್ನೆ ಪ್ರೀತಿಸುವೆ ಎಂದು
ಹಣೆಗೊಂದು ಮುತ್ತನಿಟ್ಟು..||
ಹಚ್ಚ ಹಸಿರಿನ ವನ ರಾಶಿಯಲಿ,
ನೀಲಾಕಾಶದ ಚಪ್ಪರದ ಅಡಿಯಲಿ,
ಹಕ್ಕಿಗಳ ತಾಳವಾಧ್ಯದಲಿ,
ಕೈ ಹಿಡಿದು ಹೇಳುವೆ ನೀ ನನ್ನವಳೆ ಎಂದು
ಹೂ ಮುಡಿಸಿ, ಕೆನ್ನೆಗೆ ಅರಿಶಿನವ ಹಚ್ಚಿ,
ಹಣೆಗೆ ಮಂಗಳ ಸಿಂಧೂರವನಿಟ್ಟು...||
ಹಾಲ ಬೆಳದಿಂಗಳಿರುಳಲಿ,
ಪ್ರೇಮ ಶರಧಿಯಲೆಗಳ ಏರಿಳಿತದಲಿ,
ಉಸಿರು ಬಿಸಿಯುಸಿರ ಸೇರುವಾ ಕ್ಷಣದಲಿ,
ಕಿವಿಯಲ್ಲಿ ಪಿಸುಗುಡುವೆ ಈ ಹುಟ್ಟು ನನಗಾಗಿ ಎಂದು
ತುಟಿಮೇಲೆ ತುಟಿಯನಿಟ್ಟು,
ಮನಸೊಳಗೆ ಮನಸನಿಟ್ಟು...||
