ಕಥಾನಾಯಕಿ...

ಮುದ್ದಾದ ಮನಸೊಂದು ಕಾದಿದೆ,
ಮನಬಿಚ್ಚಿ ಹಕ್ಕಿಯಂತೆ ಹಾರಿದೆ,
ಮನಸಿನ ಅಂಗಳಕೆ ಹಾರಿಬಂದು,
ಮನಸೊಳಗೆ ಬರಲು ಯೋಚಿಸುತಿದೆ...

ಒಲವೆಂಬ ಸೌಧವನು ಇಟ್ಟಿಗೆಯಿಲ್ಲದೆ ಕಟ್ಟಿದಳು,
ತಳದ ಪಾಯಕೆ ಪ್ರೀತಿಯ ಸುಧೆ ಹರಿಸಿದಳು,
ಕುಲದ ತಕರಾರು ಎಂದೂ ಬರದಿರಲಿ ಈ ಪ್ರೀತಿಯಲಿ,
ಛಲದೆ ನೆಲೆಯ ಸೇರೋಣ ಒಂದೇ ಮನಸಿನಲಿ,
ಒಲವ ಸೌಧದ ಅರಸಿ ಅರಗಿಣಿ ನೀನೆ,
ಒಲವ ಸವಿಯುವ ನಿನ್ನಿನಿಯ ನಾನೇ...

ಕಥೆಯ ಬರೆದಳು ಕಣ್ಣ ಸನ್ನೆಯಲಿ,
ಕಥಾನಾಯಕಿ ಅವಳು ನನ್ನ ಕನಸಿನಲಿ,
ಕಥೆಯ ಅಂತ್ಯ ಏನೇ ಇರಲಿ,
ಕಥೆಗೆ ನಾಯಕ ನಾನೇ, ಅವಳ ಕನಸಿನಲಿ,
ಕಥೆಯ ಪೂರ್ಣವಿರಾಮ ಅವಳ ಇಚ್ಛೆ....

ತುಂಟ ಬೆರಳು...

ತೆವಳುತಿದೆ ತೋರ್ಬೆರಳ ತುದಿ
ಅಂಗನೆಯ ಮುಂಗುರುಳ ಬಳಿಗೆ,
ಸುರುಳಿಯಾಗಿಸಿಯದನು ಇಳಿಯುತಿದೆ
ಹೊಳೆವ ಕಣ್ಣುಗಳ ಕಡೆಗೆ...

ಮೀನಾಕ್ಷಿಯವಳ ಕಣ್ಣುಗಳ ಚುಂಬಿಸಲು
ಸದ್ದಿಲ್ಲದೆ ಸಾಗಿದೆ ಅಧರದೆಡೆಗೆ,
ತೊಂಡೆ ತುಟಿಗಳನೊಮ್ಮೆ ಚಿವುಟಿರಲು ಆ ಬೆರಳು,
ಮೇಲೇರಿತು ಅವಳ ಹುಬ್ಬು,
ತುಟಿಗೆ ತುಟಿಯೊತ್ತಿ ಮುತ್ತಿಡಲು ಬರಿಯ ಮೌನ...

ಕೊರಳಿಂದ ಕೆಳಗಿಳಿಯೆ ಬೆರಳು, ಕೇಳಿತು...
ನನ್ನೇಕೆ ಮರೆತೆ ಇನಿಯನೆ? ನಾಗೈದ ಅಪರಾಧವೇನು???
ಹೇಗೆ ಮರೆಯಲೆ ನಿನ್ನ??? ಇದೋ ನಿನಗಾಗಿ
ಮುತ್ತುಗಳ ಹಾರ, ಮತ್ತದೇ ಸ್ನಿಗ್ಧ ಮೌನ...

ಎದೆಗೂಡ ನಡುವೆ ನುಸುಳಿ ನುಗ್ಗಿ
ನಡುವ ತಲುಪಿದೆ ಬೆರಳು,
ಒಂದರಿಂದಾಗದು ಎಂದು ಎರಡು ಕೈಯಲಿ
ನಡುವ ನವಿರಾಗಿ ಹಿಡಿದಿರಲು,
ಮತ್ತದೇ ಮೌನ ಅವಳ ಮೊಗದಲ್ಲಿ...
ಹಿಡಿತ ಬಿಗಿಯಾಗಿಸಿ, ನಾಭಿಗೆ ಬಿಸಿಯುಸಿರ ಸೋಕಿಸಿ,
ನಡುವ ಮಧ್ಯದಲಿ ಮುತ್ತೊಂದ ಮೆತ್ತಗೆ ಕೊಡಲು,
ನಾಚಿ ನುಡಿದಳು ನನ್ನಾಕೆ,
ನಿಲ್ಲಿಸೆಯಾ ಇನಿಯ ತುಂಟ ಬೆರಳಿನಾಟವನಿಂದು???

ಸುಳಿ...

ಸುಳಿದಾಡದಿರು ಗೆಳತಿ ಎನ್ನೆದೆಯ ಅಂಗಳದಲಿ,
ಸುಳಿವು ನೀಡದೆಯೆ ಬಂದು ಸೇರಿದೆ ನನ್ನೊಳಗೆ,
ಸುಳಿಯೊಳಗೆ ಸಿಲುಕಿಸಿಯೇಕೆ ದೂರ ಸರಿದೆ???

ಸೆಳೆವೆ ಕಣ್ಣುಗಳೆರಡು ಆ ನಿನ್ನ ಮೊಗದಲಿ,
ಹೊಳೆವ ಕಣ್-ಕಾಂತಿಯನೇನೆಂದು ಬಣ್ಣಿಸಲಿ,
ಮಳೆ, ಮಿಂಚು ಸಿಡಿಲುಗಳೆಲ್ಲ ಆ ಕಣ್ಣುಗಳಂಚಿನಲಿ,
ಇಳೆಗಿಳಿದು ಪ್ರೀತಿಸಿದೆ ಆ ಜೋಡಿ ಕಂಗಳಿಗಾಗಿ,
ಸುಳಿಯೊಳಗೆ ಸಿಲುಕಿಸಿಯೇಕೆ ದೂರ ಸರಿದೆ????

ಹಲವಾರು ದಿನರಾತ್ರಿಗಳ ಕನಸಿನಲಿ,
ಒಲವ ಪ್ರತಿಮೆಯನಿಟ್ಟು ಮನದ ಗುಡಿಯಲಿ,
ನಲಿವ ದುಂಡು ಮಲ್ಲಿಗೆಯ ಹೂಗಳಲಿ,
ಅರ್ಚಿಸಿ ಪೂಜಿಸಿದೆ ಗೆಳತಿ ನಿನ್ನ ಪ್ರತಿಮೆಯನು,
ಸುಳಿಯೊಳಗೆ ಸಿಲುಕಿಸಿಯೇಕೆ ದೂರ ಸರಿದೆ????

ಕೊನೆಯತನಕ...

ಅವಿತು ಕುಳಿತಿರುವೆ ನೀ ಮನದ ಆಳದಲಿ,
ಕವಿತೆ ಗೀಚಿರುವೆ ನಾ ಗಾಳಿಯ ಹಾಳೆಯಲಿ,
ಚಿರತೆಯ ವೇಗವಿದೆ ಈ ಪ್ರೀತಿಯ ಲೇಖನಿಯಲಿ,
ಕೊರತೆಯೇನಿದೆ ಹೇಳೇ ಗೆಳತಿ ನನ್ನ ಪ್ರೀತಿಯಲಿ?
ಒಮ್ಮೆ ಒಪ್ಪಿದರೆ ಸಾಕೆ ಬಿಡೆನಿನ್ನ ಕೊನೆಯತನಕ...

ಕಳೆದ ಕಾಲದ ಆ ಕಹಿ ನೆನಪುಗಳ
ಕಾಲಾಂತರಾಳದಲಿ ಕೊರೆದು ಅಡಗಿಸಿಡು,
ಕಳೆಯೋಣ ಬರುವ ಕಾಲವನು
ಕನಕದಂಬಾರಿಯಲಿ ಕುಳಿತು,
ಒಮ್ಮೆ ಒಪ್ಪಿದರೆ ಸಾಕೆ ಬಿಡೆನಿನ್ನ ಕೊನೆಯತನಕ...

ಕನಸ ಕಂಡಿಹೆನಂದು ನೀ ಒಪ್ಪಿದೆಯೆಂದು,
ಮನಸಲೆಂದೆಂದು ಅನಿಸಿಲ್ಲ ನನಸಾಗುವುದೆಂದು,
ಕನಸು ಕಾಣುವವನು ಕನಸುಗಾರ,
ಕನಸುಗಾರನು ನಾನಲ್ಲ, ಕನಸೆಂದು ಕಂಡಿಲ್ಲ ಗೆಳತಿ,
ಕನಸಲ್ಲೇ ಕಂಡೆ ನಾ ಸೌಂದರ್ಯ ರಾಶಿಯನು
ಒಪ್ಪಿಸಿಕೋ ನಿನ್ನ, ಅಪ್ಪುವೆನು ಚಿನ್ನ...
ಒಮ್ಮೆ ಒಪ್ಪಿದರೆ ಸಾಕೆ ಬಿಡೆನಿನ್ನ ಕೊನೆಯತನಕ...

ನಿನ್ನೇ ಪ್ರೀತಿಸುವೆ...

ಸಹ್ಯಾದ್ರಿ ಸಾಲಿನ ಮಧ್ಯದಲಿ,
ಬೆಳ್ಳಿ ಮೋಡಗಳ ತೇರಿನಲಿ,
ಶರಾವತಿಯ ನಿಶ್ಯಬ್ದ ರಾಗದಲಿ,
ಬಿಗಿದಪ್ಪಿ ಹೇಳುವೆ ನಿನ್ನೆ ಪ್ರೀತಿಸುವೆ ಎಂದು
ಹಣೆಗೊಂದು ಮುತ್ತನಿಟ್ಟು..||

ಹಚ್ಚ ಹಸಿರಿನ ವನ ರಾಶಿಯಲಿ,
ನೀಲಾಕಾಶದ ಚಪ್ಪರದ ಅಡಿಯಲಿ,
ಹಕ್ಕಿಗಳ ತಾಳವಾಧ್ಯದಲಿ,
ಕೈ ಹಿಡಿದು ಹೇಳುವೆ ನೀ ನನ್ನವಳೆ ಎಂದು
ಹೂ ಮುಡಿಸಿ, ಕೆನ್ನೆಗೆ ಅರಿಶಿನವ ಹಚ್ಚಿ,
ಹಣೆಗೆ ಮಂಗಳ ಸಿಂಧೂರವನಿಟ್ಟು...||

ಹಾಲ ಬೆಳದಿಂಗಳಿರುಳಲಿ,
ಪ್ರೇಮ ಶರಧಿಯಲೆಗಳ ಏರಿಳಿತದಲಿ,
ಉಸಿರು ಬಿಸಿಯುಸಿರ ಸೇರುವಾ ಕ್ಷಣದಲಿ,
ಕಿವಿಯಲ್ಲಿ ಪಿಸುಗುಡುವೆ ಈ ಹುಟ್ಟು ನನಗಾಗಿ ಎಂದು
ತುಟಿಮೇಲೆ ತುಟಿಯನಿಟ್ಟು,
ಮನಸೊಳಗೆ ಮನಸನಿಟ್ಟು...||

ಕೊಲ್ಲುತಿವೆ ಕಣ್ಣುಗಳೆರಡು...

ಕವಿಯ ಮನಸನು ಕೊಲ್ಲುತಿವೆ ಕಣ್ಣುಗಳೆರಡು,
ಅರಿಯಲಾರೆನು ಹೊಳಪಿನ ಮೂಲವೇನೆಂದು,
ತಡೆಯಲಾರೆನು ನಾ ಸೆಳೆತದ ಆಳವನು,
ಮನದ ಭಾರವನಿಳಿಸಲು ಒಮ್ಮೆ ಕಣ್ಸನ್ನೆ ಮಾಡೆ ಗೆಳತಿ...

ಬೆಲ್ಲದ ಪಾಕದಲು ಕಲ್ಲು ಸಿಗಬಹುದು,
ಸುಳ್ಳಿಲ್ಲವೇ ಗೆಳತಿ ನನ್ನ ಪ್ರೀತಿಯಲಿ,
ಕಲ್ಲು ಮನದವರೂ ಕರಗಿ ನೀರಾದರು,
ಹೂವಂತೆ ಸೂಕ್ಷ್ಮ, ಜೇನಹನಿ ಈ ಪ್ರೀತಿ ಸವಿಯೇ ಗೆಳತಿ...

ಆಘಾತವಾಗಿದೆ ಒಂದು ಸಲ ಪುಟ್ಟ ಹೃದಯಕೆ,
ಬಲವಿಲ್ಲ ನನ್ನಲಿ ಮತ್ತೊಂದು ಆಘಾತ ತಡೆಯಲು,
ಬಿಟ್ಟು ಹೋಗದಿರು ನನ್ನ ಯಾವ ಸಂದರ್ಭದಲು,
ಬಿಟ್ಟು ಹೋದರೆ ಬಿಡುವೆನೀಜೀವ, ನನ್ನುಸಿರು ನೀನು ಗೆಳತಿ...

ಮಿಲನ...

ಅನವರತ ಅನುಸರಿಸಿ,
ಉಸಿರೆಲ್ಲ ಉಣಬಡಿಸಿ,
ಕನಸಲ್ಲೇ ಕನವರಿಸಿ,
ಮುದುಡಿದ್ದ ಮನತಣಿಸಿ,
ನಿನ್ನ ಹಿಂದೆ ಬಂದೆ ಗೆಳತಿ.....

ನೆನಪುಗಳು ನಳನಳಿಸಿ,
ನೆನಪಲ್ಲೇ ನನ್ನಳಿಸಿ,
ನೆನಪಾಗಿ ನಿನ್ನುಳಿಸಿ,
ಮರುಗಿದ್ದ ಮನಸವೆಸಿ,
ನಿನಗಾಗಿ ಕಾದೆ ಗೆಳತಿ.....

ನಿನ್ನಾಸೆ ನಿಗ್ರಹಿಸಿ,
ಒಲವನ್ನು ಒಳಗಿಳಿಸಿ,
ಹೃದಯದಲಿ ಹನಿಸುರಿಸಿ,
ತಂಗಾಳಿ ತಂಪುಣಿಸಿ,
ತಡೆಹಿಡಿದ ಆಸೆಗಳ ಚೆಲುವಿಂದ ಚಿಮ್ಮಿಸುತ,
ನನ್ನ ಹೃದಯ ಸೇರೆ ಗೆಳತಿ...

ಕಳೆದೆ ಕಳೆದಿರುಳ...

ಕಳೆದೆ ಕಳೆದಿರುಳ
ಕನಸಲಿ ಕಂಡ
ಕಮಲನಯನೆಯ
ಕರಕಮಲಗಳಲ್ಲಿ....

ಕಳೆದ ಕ್ಷಣವನೆ ಕನವರಿಸಿ
ಕಾಲಾಂತರಾಳದಲಿ
ಕರಗಿ ಕಾದಿರುವೆ ನಾ...
ಕೊರಳಂಚಿನವರೆಗು
ಕೋಪವನು ಕೆರಳಿಸದೆ
ಕಷ್ಟವಾದರೂ ಸರಿಯೇ
ಕಣ್ಣೆದುರು ನಿಲ್ಲೆ ಗೆಳತಿ...

ಕಹಿಯ ಕಲ್ಪನೆಗಳೆಲ್ಲ
ಕೊಸರಲ್ಲು ಇರದಿರಲಿ
ಕಣ್ಣ ನೇರದ ನೋಟ
ಕಳಶದ ಕಡೆಯಿರಲಿ,
ಕನಸ ಕನ್ನಿಕೆಯೆಂದು
ಕಣ್ಣೆದುರು ನಿಲ್ಲುವಳೆಂದು
ಕಾತರದಿ ಕಾದಿವುವೆ,
ಕೇಳೆ ಗೆಳತಿ ನಾ ಕಲ್ಪನಾವಿಹಾರಿ.... :)

ಹೊಸತು...

ಹೊಸತಲ್ಲಿ ಮಾತ್ರವೆ
ಹೊಸದು ಎಲ್ಲವು...
ಏನಾದರಾಗಲಿ
ಯಾವುದಾದರು ಇರಲಿ,
ಹೊಸತಲ್ಲಿ ಮಾತ್ರವೇ
ಹೊಸದು ಈ ಜಗದಲ್ಲಿ...

ಹೊಸತು ಗೆಳೆತನವಿಂದು,
ಹಳಸಿ ಹಳತಾಗುವುದು ಮರುಕ್ಷಣ...

ಹೊಸತು ಪ್ರೇಮವು ಇಂದು,
ಮನಸವೆಸಿ ಹಳತಾಗುವುದು ಮರುಘಳಿಗೆ...

ಹೊಸತು ವಿವಾಹವು ಇಂದು,
ಬೆವರ್ಹರಿಸಿ ಹಳತಾಗುವುದು ಮರುದಿನ...

ಹೊಸತು ವಸ್ತುವು ಇಂದು,
ಮಾಸಿ ಹಳತಾಗುವುದು ನಾಳೆ...

ಇಂದಿನ ಎಲ್ಲ ಹೊಸತುಗಳು,
ಮುಂದೊಮ್ಮೆ ಹಳತುಗಳೇ...
ಇಂದು ಮುಂದಿನ ನಡುವೆ
ಮಂದಗತಿಯಲಿ ಚಲನೆ...
ಒಂದೇ ದಿನದಲಿ ಎಲ್ಲವನು ಬಯಸಿ,
ಬೆಂದು ಬರಡಾಗದಿರು,
ಹೊಸತ ಅರಸಿರುವ
ನವ ಕಲ್ಪನಾವಿಹಾರಿ... ||

ನೋಡಬೇಕೆನಿಸಿದೆ...

ಕನಸೆಂಬ ಊರಲ್ಲಿ,
ಕನವರಿಸಿದ ಮನದಲ್ಲಿ,
ಮಿನುಗುತಿಹ ತಾರೆ ನೀನು,
ಕಣ್ಮುಂದೆ ಬಾರೆ ಗೆಳತಿ||

ಕನಸಲ್ಲೇ ನೋಡಿ ನೋಡಿ,
ಕಹಿನೆನಪು ಮೂಡಿ,
ಮನಸಿಂದು ಬಾಡಿದೆ,
ಕಣ್ಮುಂದೆ ಬಾರೆ ಗೆಳತಿ||

ಮುದ್ದು ಮಲ್ಲಿಗೆ ಹೂವೆ,
ಮನದಲ್ಲೆಲ್ಲಾ ಬರಿ ನೋವೆ,
ಮರೆತರು ಮರೆಯಲಾರೆ ನಿನ್ನ,
ಕಣ್ಮುಂದೆ ಬಾರೆ ಗೆಳತಿ||

ಮರಳುಗಾಡಲಿ ಇನ್ನು,
ಬೇಯಲಾರೆನು ನಾನು,
ನೋಡಬೇಕೆನಿಸಿದೆ ನಿನ್ನ,
ಕಣ್ಮುಂದೆ ಬಾರೆ ಗೆಳತಿ||

ಕನಸು...

ನಂದು ಇಂದುಗಳೆಲ್ಲಾ
ಎಂದೋ ಕಂಡ ಕನಸು,
ಮುಂದು ಯಾರೆಂದು
ಕಾಣಬೇಕಿದೆ ಇಂದು ಕನಸು ||

ಹಿಂದಾದರಾಗಲಿ
ಇಂದಾದರಾಗಲಿ
ಮುಂದಾದರಾಗಲಿ
ಕಂಡ ಕನಸೆಂದೆಂದು ಮಧುರ ||

ಹಿಂದೆ ನಂದು ಬಂದಳು
ಇಂದು ಇಂದು,
ಮುಂದೆ ಬರಬಹದು ವಂದು
ಕಂಡ ಕನಸೆಂದೆಂದು ಮಧುರ ||

ನಂದು ನನ್ನವಳಲ್ಲ
ಇಂದು ಇರಲು ಬರಲಿಲ್ಲ,
ಮುಂದೆ ಬರುವವಳ ಬಗ್ಗೆ ತಿಳಿದಿಲ್ಲ
ಕಂಡ ಕನಸೆಂದೆಂದು ಮಧುರ ||

ಹಿಂದೆ ತಡೆದವರಿಲ್ಲ,
ಇಂದಿನ ಅರಿವು ಎಮಗಿಲ್ಲ,
ಮುಂದೆ ತಡೆಯುವರಿಲ್ಲ,
ಕನಸು ನಿನ್ನದು ಗೆಳೆಯ,
ಕನಸ ಕಾಣಲು ಬೇಕಿಲ್ಲ ಕಾಸು,
ಸವಿಯ ಸವಿಯಲು ಮಾತ್ರ ಕನಸು
ಕನಸೇ ಜೀವನವಲ್ಲ
ಕಂಡ ಕನಸೆಂದೆಂದು ಮಧುರ ||