ಉಸಿರುಸಿರ ಬೆಸುಗೆ.....

ಕನಸಿನ ಕುಂಚದಲಿ ಕಣ್ಣ ಹಿಂಡಿದರೆ,
ಕಲೆಯ ಗತಿಯೇನು ಹೇಳೆ ಗೆಳತಿ!!
ಕಾರ್ಮೋಡ ಕಾವಿನಲಿ ಕಾರಿದರೆ,
ಕಾಯ, ಕಳೇಬರವೆ ನಿಜ ಕೇಳೆ ಗೆಳತಿ!!

ಮಾಗದ ಮನಸಿಗೆ ಮಾಘಿಯ ಗಾಳಿಯ ತಂದೆ,
ಮರುಗಿ ಮಣ್ಣಾಗಿದೆ ಮನ ನೋಡೆ ಗೆಳತಿ!!
ಮೋಹದ ಮಾಯೆಯಲಿ ಮರೆತು ಮಿಂದೆ,
ಮೌನ ಮೆರೆದಿದೆ, ಮೊಗ ಸೊರಗಿದೆ ಅರಿಯೆ ಗೆಳತಿ!!

ಕಣ್ಣ ಹನಿಗಳ ಅಳಿಸೆ, ಕಾಣದ ನಗೆ ತರಿಸೆ,
ಮಳೆ ಹನಿಗಳ ತಂಪಾಗಿ ಸುರಿಸೆ ಗೆಳತಿ!!
ಮಾಯೆಯ ಮರೆಸಿ, ಮೂಗನ ನುಡಿಸೆ,
ಚಿಂತೆಯ ಚಿತೆಗೆ ಕಳಿಸಿ,ಮರುಗಿದ ಮಾನವ ಮೆರೆಸಿ,
ಕಾಯುತಿಹ ಉಸಿರ ಹೆಸರಿಸಿ, ಉಸಿರುಸಿರ ಬೆರೆಸೇ ಗೆಳತಿ!!!!!!