ನೆಪ...

ಕಾಲ ಕಿರುಬೆರಳ ಉಗುರ ಅಡಿಯಲ್ಲಿ,  
ಅಡಗಿರುವ ಸೌಂದರ್ಯ ರಾಶಿಯೇ,
ಉಗುರ ಕಡಿಯುವ ನೆಪದೆ
ಅಣು ಅಣುವಾಗಿ ಸವಿಯುವ ಬಯಕೆ ಎನ್ನ ತುಂಟ ಮನಕೆ...

ನುಣುಪು ಹಿಮ್ಮಡಿಯ ಮೇಲೆ,
ಕಾಣುವ ಕಣಕಾಲೇ,
ಧೂಳು ತೆಗೆಯುವ ನೆಪದೆ
ಕಾಲ್ಗೆಜ್ಜೆ ತೊಡಿಸುವ ಬಯಕೆ ಎನ್ನ ತುಂಟ ಮನಕೆ...

ಬಳುಕೊ ಸಿಂಹಿಣಿಯ ನಡುವೆ,
ನಡುವೆ ಏನಿಟ್ಟಿರುವೆ??
ಏನಿದೆಯೊ ಹುಡುಕುವ ನೆಪದೆ
ಉಡುಪೊಂದ ಉಡಿಸುವ ಬಯಕೆ ಎನ್ನ ತುಂಟ ಮನಕೆ...

ಹಂಸಪಕ್ಷಿಯ ಕೊರಳೆ,
ಕಂಠದಲು ಗಂಟಿಲ್ಲವೇನೇ?
ಆಳವ ಅಳೆವ ನೆಪದೆ
ವಜ್ರಹಾರವ ತೊಡಿಸುವ ಬಯಕೆ ಎನ್ನ ತುಂಟ ಮನಕೆ...

ಕಣ್ಣು ಕಮಲದ ಮೊಗ್ಗು, ಮೂಗು ಸಂಪಿಗೆ,
ತುಟಿಗಳೇನೆಂದು ಹೇಳಲೇ?
ಹೋಲಿಕೆಯ ಹೋಲಿಸುವ ನೆಪದೆ
ತುಟಿಗೆ ಮುತ್ತಿಡುವ ಬಯಕೆ ಎನ್ನ ತುಂಟ ಮನಕೆ...

ಮಂದಾರ ಪುಷ್ಪದ ಮೊಗದ, ಮಂದ ಮತಿ ಮುಗ್ದೆ,  
ನಗುವ ಮೇಲಿನ ನಾಸಿಕ, ನಯನಗಳ
ನೋಡುತಿಹ ನೊಸಲಿನ ನಟ್ಟ ನಡು ಮಧ್ಯದಲಿ,
ಸೌಭಾಗ್ಯದ ಸಿಂಧೂರವಿಡುವ ಬಯಕೆ ಎನ್ನ ಮುಗ್ದ ಮನಕೆ||

ಏನ ಹೇಳಲಿ...?

ಏನ ಹೇಳಲಿ ನಾನು...?? ಎನ್ನ ಒಡಲಿನ ಬೆಂಕಿ ಸುಡುತಿದೆ ನರ-ನಾಡಿಗಳೆಲ್ಲವನು, ತಂಗಾಳಿಯಾಗಿ ತಬ್ಬುವೆಯಾ ಒಮ್ಮೆ ನೀನು|| ಏನ ಹೇಳಲಿ ನಾನು...?? ತಣಿಸುವುದ ಮರೆತು ತಂಗಾಳಿ, ಬಿಸಿಯುಸಿರಲಿ ಬೆರೆತು ಆಗಿದೆ ಬಿಸಿಗಾಳಿ, ಮುಂಜಾನೆ ಮಂಜಾಗಿ ಮೈಸೇರು ಒಮ್ಮೆ ನೀನು|| ಏನ ಹೇಳಲಿ ನಾನು...?? ಮಂಜು ಮೈ ಸೇರಿದರು ಇಳಿಯದಾಗಿದೆ ಕಾವು, ಎನ್ನೊಡಲಲ್ಲೇ ಅಡಗಿರು ಸದಾ ನೀನು||

ಯಾರಿಗಾಗಿ..??

ಬಾಳೆಯ ತೋಟದಲಿ ಕಂಡ
ಬಾಳೆದಿಂಡಿನ ಬಾಲೆ,
ಬೆಳ್ಳಿ ಬೆಳಕಲಿ ಹೊಳೆದು
ಬಳುಕುತಿರುವೆ ನೀ ಯಾರಿಗಾಗಿ??

ಕೊಳದ ಕಮಲದೆ ಕಣ್ಣು,
ಪಳ-ಪಳನೆ ಮಿಂಚುತಿದೆ,
ಕೊಲ್ಲುವಂತಿದೆ ಕಣ್ಣಂಚಿನ ಮಿಂಚು,
ಕಣ್ಣಂಚಿನ ಸಂಚಿನಾಟವು ಯಾರಿಗಾಗಿ??

ತೊಂಡೆ ಹಣ್ಣಿನ ತುಟಿಯ,
ತಿಂದು ರುಚಿಸುವ ಬಯಕೆ,
ನೂರೊಂದು ಮುತ್ತುಗಳ ಸಾಲಾಗಿ ಜೋಡಿಸಿಹೆ,
ಸಾಲ ಮುಂದಿರುವ ಕೆಂದುಟಿಯು ಯಾರಿಗಾಗಿ??

ಶಿಲೆಯ ಒಳಗಣ ಕಲೆಯ
ಕೆತ್ತಿ ತೋರಿಸುವಂತೆ,
ನಿನ್ನಂದ ತೋರುತಿಹ ಕಲೆಯೊಡತಿ
ಶಿಲಾಬಾಲಿಕೆಯ ಭಂಗಿ ಯಾರಿಗಾಗಿ??

ಹಸಿರ ಕಾನನದಲ್ಲಿ
ಒಂಟಿ ಮರವೊಂದಕ್ಕೆ
ಅಪ್ಪಿ ನಿಂತಿರುವ ಬಳ್ಳಿ ನೀ,
ಆ ಒಲವಿನ ಅಪ್ಪುಗೆ ಯಾರಿಗಾಗಿ??

ನೋಡಬೇಕೆನಿಸಿದೆ...

ಕನಸೆಂಬ ಊರಲ್ಲಿ,
ಕನವರಿಸಿದ ಮನದಲ್ಲಿ,
ಮಿನುಗುತಿಹ ತಾರೆ ನೀನು,
ಕಣ್ಮುಂದೆ ಬಾರೆ ಗೆಳತಿ||

ಕನಸಲ್ಲೇ ನೋಡಿ ನೋಡಿ,
ಕಹಿನೆನಪು ಮೂಡಿ,
ಮನಸಿಂದು ಬಾಡಿದೆ,
ಕಣ್ಮುಂದೆ ಬಾರೆ ಗೆಳತಿ||

ಮುದ್ದು ಮಲ್ಲಿಗೆ ಹೂವೆ,
ಮನದಲ್ಲೆಲ್ಲಾ ಬರಿ ನೋವೆ,
ಮರೆತರು ಮರೆಯಲಾರೆ ನಿನ್ನ,
ಕಣ್ಮುಂದೆ ಬಾರೆ ಗೆಳತಿ||

ಮರಳುಗಾಡಲಿ ಇನ್ನು,
ಬೇಯಲಾರೆನು ನಾನು,
ನೋಡಬೇಕೆನಿಸಿದೆ ನಿನ್ನ,
ಕಣ್ಮುಂದೆ ಬಾರೆ ಗೆಳತಿ||

ನಲಿದಾಡುತಿರುವೆ...

ನಗುವ ಮರೆತ ಯುಗದಲಿ
ಕಾದ ಕಡಲಾಗಿದ್ದೆ ನಾನು,
ಅಂದದರಸಿಯ ಚೆಂದದ ನಗುವ ಕಂಡೆ,
ಕಾದು ಕುಳಿತಿದ್ದ ಸಮಯವ ಮರೆತು
ನಿನ್ನ ನಗೆಯಲ್ಲೇ ನಲಿದಾಡುತಿರುವೆ...||

ಕಡಲೊಡಲಿನ ಕಪ್ಪೆಚಿಪ್ಪಲಿ
ಸ್ವಾತಿ ಮಳೆಹನಿಯ ಮುತ್ತು,
ಮುತ್ತು ಮುತ್ತುಗಳೊಂದೊಂದು
ಮತ್ತೊಂದರೊಡನೆ ಬೆರೆತ
ನಗುವ ಮುತ್ತಿನ ಹಾರದಲೆ ನಲಿದಾಡುತಿರುವೆ...||

ತಿಳಿ ಹಾಲ ಕೊಳದಲ್ಲಿ,
ತಡ ಜಾವದಲಿ ಮಿಂದು
ಮಡಿಯುಡುಗೆಯಲಿ ಬಂದ
ಶ್ವೇತ ಸುಂದರಿ ನಿನ್ನ
ಹಾಲ್ಗಲ್ಲದ ನಗುವಲ್ಲೇ ನಲಿದಾಡುತಿರುವೆ...||

ಕನಸು...

ನಂದು ಇಂದುಗಳೆಲ್ಲಾ
ಎಂದೋ ಕಂಡ ಕನಸು,
ಮುಂದು ಯಾರೆಂದು
ಕಾಣಬೇಕಿದೆ ಇಂದು ಕನಸು ||

ಹಿಂದಾದರಾಗಲಿ
ಇಂದಾದರಾಗಲಿ
ಮುಂದಾದರಾಗಲಿ
ಕಂಡ ಕನಸೆಂದೆಂದು ಮಧುರ ||

ಹಿಂದೆ ನಂದು ಬಂದಳು
ಇಂದು ಇಂದು,
ಮುಂದೆ ಬರಬಹದು ವಂದು
ಕಂಡ ಕನಸೆಂದೆಂದು ಮಧುರ ||

ನಂದು ನನ್ನವಳಲ್ಲ
ಇಂದು ಇರಲು ಬರಲಿಲ್ಲ,
ಮುಂದೆ ಬರುವವಳ ಬಗ್ಗೆ ತಿಳಿದಿಲ್ಲ
ಕಂಡ ಕನಸೆಂದೆಂದು ಮಧುರ ||

ಹಿಂದೆ ತಡೆದವರಿಲ್ಲ,
ಇಂದಿನ ಅರಿವು ಎಮಗಿಲ್ಲ,
ಮುಂದೆ ತಡೆಯುವರಿಲ್ಲ,
ಕನಸು ನಿನ್ನದು ಗೆಳೆಯ,
ಕನಸ ಕಾಣಲು ಬೇಕಿಲ್ಲ ಕಾಸು,
ಸವಿಯ ಸವಿಯಲು ಮಾತ್ರ ಕನಸು
ಕನಸೇ ಜೀವನವಲ್ಲ
ಕಂಡ ಕನಸೆಂದೆಂದು ಮಧುರ ||

ಕಣ್ಣು ...

ಪದವೇ, ಪದವಿಯೇತಕೆ ಬೇಕೇ
ಪ್ರೀತಿ ಪಾರಾಯಣಕೆ?
ನೀನೊಬ್ಬಳೆ ಸಾಕು, ಪದಗಳ ರಾಶಿ
ಅಡಗಿರಲು ನಿನ್ನ ಕಂಗಳಲಿ ||

ಕಣ್ಣನೋದುವ ಕಲೆಯ
ಅರಿತಿರುವ ಪದವೇ,
ಸಪ್ತ ಸಾಗರಗಳೆ
ಉಬ್ಬು ತಗ್ಗುಗಳು ನಿನ್ನ ಕಂಗಳಲಿ ||

ಕಪ್ಪು ಬಿಳುಪುಗಳೆರಡು
ಬರಿಯ ಬಣ್ಣಗಳಲ್ಲ,
ಕಪ್ಪು ಬಿಳುಪುಗಳೇ
ಹಗಲು ರಾತ್ರಿಗಳೆನಗೆ ನಿನ್ನ ಕಂಗಳಲಿ ||