ಆಷಾಡ...

ಆಷಾಡದ ತಂಗಾಳಿ ಆಸೆಗಳ ಚಿಮ್ಮಿಸಲು,
ನವಜೋಡಿಯು ಅನುರಾಗದ
ಅಲೆಗಳನು ಅವಿತಿಟ್ಟು,
ವಿರಹದ ಬೇಗೆಯಲಿ ಪರಿಪರಿಯಲಿ ಬೆಂದು
ಶ್ರಾವಣದ ಆಗಮಕೆ ಕಾದಿರುವ
ಬಗೆಯನೇನೆಂದು ಹೇಳಲೇ ಒಲವ ಗೆಳತಿ... :)

ಆಷಾಡವಾಗಲಿ ವೈಶಾಖವಾಗಲಿ,
ಚೈತ್ರ ಶ್ರಾವಣಗಳೇ ಆಗಲಿ,
ಹುಣ್ಣಿಮೆಯು ಬರದೆಹೋಗುವುದೇನೆ?
ಸಾಗರವು ಉಕ್ಕದಿರುವುದೇನೆ?
ಪ್ರಕೃತಿಯ ಚಕ್ರದಲಿ ಅವಕಿಲ್ಲದ ಅಂತರ,
ಬೇಕೇ ನಮ್ಮಿಬ್ಬರ ನಡುವೆ? ಹೇಳೆಲೇ ಒಲವ ಗೆಳತಿ...

ಅವರಿವರ ಮಾತಿಗೆ ಕಿವಿಗೊಡದೆ,
ಹಿರಿಯರ ಸಲಹೆಯ ಸ್ವೀಕರಿಸಿ,
ಅರಿತ ಜೀವದ ಜೊತೆಗೆ,
ಬೆರೆಸಿ ಒಲವಿನ ಸವಿಯ,
ಬಡಿಸಿದ ಭೋಜನವ ಮಿತವಾಗಿ ಭುಜಿಸಿ,
ಹಿತವಾದ ಅನುರಾಗ ಅನುಭವಿಸಿ
ಪ್ರಕೃತಿಯಲೊಂದಾದರೆ ಸಾಲದೇ? ಹೇಳೆಲೇ ಒಲವ ಗೆಳತಿ...