ಎರಡು ಮನಗಳು...

ಎರಡೇ ದಿನ ಸಾಕೆನಗೆ ನಿನ್ನ ಮನವನರಿಯಲು,
ಎರಡು ಕ್ಷಣ ಸಾಕೆನಗೆ ನಿನ್ನ ಮನವೊಲಿಸಲು,
ಎರಡು ಮಾತು ಸಾಕೆನಗೆ ನಿನ್ನ ಈ ಜಗವ ಮರೆಸಲು,
ಎರಡು ಯೋಚನೆ ಏಕೆ ಗೆಳತಿ ಒಮ್ಮೆ ಸಮ್ಮತಿಸು,
ಎರಡು ಮನಗಳು ಒಂದಾಗಲಿ ಈ ಅಮೃತ ಘಳಿಗೆಯಲಿ...

ಎರಡು ಕಣ್ಣುಗಳಲ್ಲಿ ಮೊದಲಾಯಿತು ಮೊದಲ ಪ್ರೀತಿ,
ಎರಡು ತುಟಿಗಳು ಅರಿತು, ನಿವೇದಿಸಿದವು ನಿನ್ನಲಿ,
ಎರಡು ಕಣ್ಣೀರ ಹನಿ, ಕೋಪ ಕರಗಿಸುವ ರೀತಿ,
ಎರಡು ನೀರ ಹನಿ, ಜೀವ ಉಳಿಸುವ ರೀತಿ,
ಎರಡು ಮಾತನಾಡದೆಯೆ ಒಪ್ಪಿಕೋ ನೀನು ಒಲವ ಒಡತಿ...

ಎರಡು ಹುಸಿ ಮುನಿಸು ಬರುವುದು ಪ್ರೀತಿಯಲಿ,
ಎರಡೆರಡು ಮಾತಲ್ಲಿ ಚುಚ್ಚುವರು ಜಗದಲ್ಲಿ,
ಎರಡೇ ದಿನದ ಮುನಿಸು ಅರ್ಥವಾಗದೆ ನಿನಗೆ?
ಎರಡು ಸುಳ್ಳಾಡಲು ನೀನು ಎರಡು ದಿನದ ಕೋಪ ನನಗೆ,
ಎರಡಕ್ಷರದ ಪ್ರೀತಿ ಎಂದಿಗೂ ಸುಳ್ಳಲ್ಲ ಗೆಳತಿ,
ಜಗವೇ ಎರಡಾದರೂ, ಜೀವದಾಕಾರ ಅಳಿದರೂ,
ಗಾಳಿಯಲಿ ಬೆರೆತ ಉಸಿರಲ್ಲೇ ಪ್ರೀತಿಸುವೆ ನಿನ್ನ ನಾನು....

ಪ್ರೀತಿಯ ಓಲೆ...

ನಿನ್ನ ಮೊಗ ನೋಡಲಾರೆನು ನಾನು,
ದೂರವಿರು ನನ್ನಿಂದ...
ಕರಗಿ ಕೆಳಗಿಳಿಯೇ ಕಂಗಳಂಚಿಂದ
ಕಣ್ಣೀರ ಹನಿಯಾಗಿ ಮನದಾಳದಿಂದ....

ಕಣ್ಣ ಮುಚ್ಚಲು ನಾನು,
ನನ್ನೆದರು ನೀನು,
ಬೇಡವೆಂದೆಷ್ಟು ಸಲ ದೂಡಲಿ ನಿನ್ನ,
ಬೇಡನಂತೇಕೆ ಬೇಟೆಯಾಡುವೆ ನನ್ನ,
ಬೇಡಿಕೊಂಡರು ಕರುಣೆಬಾರದೆ ನಿನಗೆ???
ಬಿಡುಗಡೆಯ ನೀಡೆನಗೆ ಚೆಲುವೆ,
ನಿನ್ನ ಮೋಹ ಜಾಲದ ವ್ಯೂಹದಿಂದ....

ನೊಂದು ಬೆಂದಿರುವೆ ನಾನು,
ಇಂದು ನಾಳೆಗಳ ಅರಿವಿಲ್ಲದೆ,
ಒಂದುಸಲವಾದರು ಹೇಳು ಪ್ರೀತಿಯಲಿ,
"ನೀ ನನಗೆ ಇಷ್ಟ"ವೆಂದು.....
ಅಷ್ಟೇ ಸಾಕೆನ್ನ ಪುಟ್ಟ ಹೃದಯಕೆ,
ಎಷ್ಟೇ ಜನುಮಗಳೆ ಸಾಗಲಿ,
ಕಾಯುವೆನು ನಿನಗಾಗಿ ತೆರೆದ ಮನಸಿಂದ,
ಸೇರಿಕೊಳ್ಳವೆ ನಿನ್ನ ಮುಗ್ದ ಪ್ರೇಮದಿಂದ...