ಕೊನೆಯತನಕ...

ಅವಿತು ಕುಳಿತಿರುವೆ ನೀ ಮನದ ಆಳದಲಿ,
ಕವಿತೆ ಗೀಚಿರುವೆ ನಾ ಗಾಳಿಯ ಹಾಳೆಯಲಿ,
ಚಿರತೆಯ ವೇಗವಿದೆ ಈ ಪ್ರೀತಿಯ ಲೇಖನಿಯಲಿ,
ಕೊರತೆಯೇನಿದೆ ಹೇಳೇ ಗೆಳತಿ ನನ್ನ ಪ್ರೀತಿಯಲಿ?
ಒಮ್ಮೆ ಒಪ್ಪಿದರೆ ಸಾಕೆ ಬಿಡೆನಿನ್ನ ಕೊನೆಯತನಕ...

ಕಳೆದ ಕಾಲದ ಆ ಕಹಿ ನೆನಪುಗಳ
ಕಾಲಾಂತರಾಳದಲಿ ಕೊರೆದು ಅಡಗಿಸಿಡು,
ಕಳೆಯೋಣ ಬರುವ ಕಾಲವನು
ಕನಕದಂಬಾರಿಯಲಿ ಕುಳಿತು,
ಒಮ್ಮೆ ಒಪ್ಪಿದರೆ ಸಾಕೆ ಬಿಡೆನಿನ್ನ ಕೊನೆಯತನಕ...

ಕನಸ ಕಂಡಿಹೆನಂದು ನೀ ಒಪ್ಪಿದೆಯೆಂದು,
ಮನಸಲೆಂದೆಂದು ಅನಿಸಿಲ್ಲ ನನಸಾಗುವುದೆಂದು,
ಕನಸು ಕಾಣುವವನು ಕನಸುಗಾರ,
ಕನಸುಗಾರನು ನಾನಲ್ಲ, ಕನಸೆಂದು ಕಂಡಿಲ್ಲ ಗೆಳತಿ,
ಕನಸಲ್ಲೇ ಕಂಡೆ ನಾ ಸೌಂದರ್ಯ ರಾಶಿಯನು
ಒಪ್ಪಿಸಿಕೋ ನಿನ್ನ, ಅಪ್ಪುವೆನು ಚಿನ್ನ...
ಒಮ್ಮೆ ಒಪ್ಪಿದರೆ ಸಾಕೆ ಬಿಡೆನಿನ್ನ ಕೊನೆಯತನಕ...