ಎರಡು ಮನಗಳು...

ಎರಡೇ ದಿನ ಸಾಕೆನಗೆ ನಿನ್ನ ಮನವನರಿಯಲು,
ಎರಡು ಕ್ಷಣ ಸಾಕೆನಗೆ ನಿನ್ನ ಮನವೊಲಿಸಲು,
ಎರಡು ಮಾತು ಸಾಕೆನಗೆ ನಿನ್ನ ಈ ಜಗವ ಮರೆಸಲು,
ಎರಡು ಯೋಚನೆ ಏಕೆ ಗೆಳತಿ ಒಮ್ಮೆ ಸಮ್ಮತಿಸು,
ಎರಡು ಮನಗಳು ಒಂದಾಗಲಿ ಈ ಅಮೃತ ಘಳಿಗೆಯಲಿ...

ಎರಡು ಕಣ್ಣುಗಳಲ್ಲಿ ಮೊದಲಾಯಿತು ಮೊದಲ ಪ್ರೀತಿ,
ಎರಡು ತುಟಿಗಳು ಅರಿತು, ನಿವೇದಿಸಿದವು ನಿನ್ನಲಿ,
ಎರಡು ಕಣ್ಣೀರ ಹನಿ, ಕೋಪ ಕರಗಿಸುವ ರೀತಿ,
ಎರಡು ನೀರ ಹನಿ, ಜೀವ ಉಳಿಸುವ ರೀತಿ,
ಎರಡು ಮಾತನಾಡದೆಯೆ ಒಪ್ಪಿಕೋ ನೀನು ಒಲವ ಒಡತಿ...

ಎರಡು ಹುಸಿ ಮುನಿಸು ಬರುವುದು ಪ್ರೀತಿಯಲಿ,
ಎರಡೆರಡು ಮಾತಲ್ಲಿ ಚುಚ್ಚುವರು ಜಗದಲ್ಲಿ,
ಎರಡೇ ದಿನದ ಮುನಿಸು ಅರ್ಥವಾಗದೆ ನಿನಗೆ?
ಎರಡು ಸುಳ್ಳಾಡಲು ನೀನು ಎರಡು ದಿನದ ಕೋಪ ನನಗೆ,
ಎರಡಕ್ಷರದ ಪ್ರೀತಿ ಎಂದಿಗೂ ಸುಳ್ಳಲ್ಲ ಗೆಳತಿ,
ಜಗವೇ ಎರಡಾದರೂ, ಜೀವದಾಕಾರ ಅಳಿದರೂ,
ಗಾಳಿಯಲಿ ಬೆರೆತ ಉಸಿರಲ್ಲೇ ಪ್ರೀತಿಸುವೆ ನಿನ್ನ ನಾನು....

ಹೋಲಿಕೆ...

ಕೇಳುವವರ್ಯಾರಿಲ್ಲ ಕಣ್ಣುಗಳ ಕಂಪನವ,
ಕೇಳಿಸದೆ ಗೆಳತಿ ನನ್ನೆದೆಯ ಕೂಗು..??
ಆಲಿಸುವ ಕಿವಿಗಳು ಕಿವುಡಾದವೇಕೆ???
ಹೋಲಿಸಲು ಸಿಕ್ಕಿತೇ ಮತ್ತೊಂದು ಮನಸು....????

ಹೋಲಿಕೆಯ ಮಾಡದಿರು ಯಾವುದೇ ವಿಷಯದಲಿ...
ನಾ ಬೇರೆ ಅವ ಬೇರೆ, ಹೋಲಿಕೆಯು ಸಲ್ಲದು...
ಅವನಾಗಿ ಪ್ರೀತಿಸಲು ನಾನು ಅವನಲ್ಲ...
ನಾನು ನಾನಾಗಿ ಪ್ರೀತಿಸುವೆ ನನ್ನ ಮನಸಾರೆ...

ಉಡುಗೊರೆಯ ಕೊಡಲಾರೆ ಬಡವ ನಾನು,
ನಿನ್ನಂದ ಬಣ್ಣಿಸಿ ನಿನ್ನ ಮೆಚ್ಚಿಸಲಾರೆ,
ಮೂಕನಾಗುವೆ ನಾನು ನಿನ್ನ ಕಂಡ ಕ್ಷಣವೇ...
ಕಪಟವಿಲ್ಲದ ಪ್ರೀತಿ ಅರಿತು ಪ್ರೀತಿಸು ಗೆಳತಿ...
ಸಾವಿನಲು ಜೊತೆಬರುವೆ ತುಂಬು ಹೃದಯದಿಂದ...

ಕಥಾನಾಯಕಿ...

ಮುದ್ದಾದ ಮನಸೊಂದು ಕಾದಿದೆ,
ಮನಬಿಚ್ಚಿ ಹಕ್ಕಿಯಂತೆ ಹಾರಿದೆ,
ಮನಸಿನ ಅಂಗಳಕೆ ಹಾರಿಬಂದು,
ಮನಸೊಳಗೆ ಬರಲು ಯೋಚಿಸುತಿದೆ...

ಒಲವೆಂಬ ಸೌಧವನು ಇಟ್ಟಿಗೆಯಿಲ್ಲದೆ ಕಟ್ಟಿದಳು,
ತಳದ ಪಾಯಕೆ ಪ್ರೀತಿಯ ಸುಧೆ ಹರಿಸಿದಳು,
ಕುಲದ ತಕರಾರು ಎಂದೂ ಬರದಿರಲಿ ಈ ಪ್ರೀತಿಯಲಿ,
ಛಲದೆ ನೆಲೆಯ ಸೇರೋಣ ಒಂದೇ ಮನಸಿನಲಿ,
ಒಲವ ಸೌಧದ ಅರಸಿ ಅರಗಿಣಿ ನೀನೆ,
ಒಲವ ಸವಿಯುವ ನಿನ್ನಿನಿಯ ನಾನೇ...

ಕಥೆಯ ಬರೆದಳು ಕಣ್ಣ ಸನ್ನೆಯಲಿ,
ಕಥಾನಾಯಕಿ ಅವಳು ನನ್ನ ಕನಸಿನಲಿ,
ಕಥೆಯ ಅಂತ್ಯ ಏನೇ ಇರಲಿ,
ಕಥೆಗೆ ನಾಯಕ ನಾನೇ, ಅವಳ ಕನಸಿನಲಿ,
ಕಥೆಯ ಪೂರ್ಣವಿರಾಮ ಅವಳ ಇಚ್ಛೆ....

ಹನಿ...

ಮೊದಲ ಮಳೆಯ ಮೊದಲ ಹನಿಯೇ,
ಕೆನ್ನೆ ಮೇಲೆ ಕ್ಷಣವು ಹೊಳೆದು,
ಮನದ ಆಳಕೆ ಮೆಲ್ಲನಿಳಿದು,
ತೊದಲ ಪ್ರೀತಿಗೆ ಹುಟ್ಟು ನೀಡಿದೆಯಲ್ಲೇ,
ವಿವರಣೆಯನಾರು ಹೇಳ್ವರು ನನ್ನ ಪುಟ್ಟ ಮನಸಿಗೆ...

ಮನದೆ ಇಳಿದ ಮೊದಲ ಹನಿಯೇ,
ಮೊಳೆತ ಜೀವಕೆ ಉಸಿರ ನೀಡು,
ಉಸಿರಿಗೊಂದು ಹೆಸರ ಹೇಳು,
ಹೊಸ ಭಾವದ ಪಿಸು ಮಾತಿಗೆ,
ಸೋತಿರುವುದು ನನ್ನೆದೆಯು,
ಹೆಸರಿನ ಗಾಢಾರ್ಥ ಹೇಳು ನನ್ನ ಪುಟ್ಟ ಮನಸಿಗೆ...

ನಿನ್ನ ತುಟಿಯ ಜೇನ ಹನಿಯು,
ಸವಿಯುವಾಸೆ ಹಗಲಿರುಳು,
ಸೋತ ಎದೆಗೆ ಸ್ವಂತವಾಗಿ,
ಚಿಂತೆ-ಸಂತೆ ದೂರ ಮಾಡಿ,
ಅಂತರಾಳದೊಲವಿನಿಂದ,
ಮಧುವನದಲಿ ಮಧು ಉಣಿಸು ನನ್ನ ಪುಟ್ಟ ಮನಸಿಗೆ...

ಪ್ರೀತಿಯ ಓಲೆ...

ನಿನ್ನ ಮೊಗ ನೋಡಲಾರೆನು ನಾನು,
ದೂರವಿರು ನನ್ನಿಂದ...
ಕರಗಿ ಕೆಳಗಿಳಿಯೇ ಕಂಗಳಂಚಿಂದ
ಕಣ್ಣೀರ ಹನಿಯಾಗಿ ಮನದಾಳದಿಂದ....

ಕಣ್ಣ ಮುಚ್ಚಲು ನಾನು,
ನನ್ನೆದರು ನೀನು,
ಬೇಡವೆಂದೆಷ್ಟು ಸಲ ದೂಡಲಿ ನಿನ್ನ,
ಬೇಡನಂತೇಕೆ ಬೇಟೆಯಾಡುವೆ ನನ್ನ,
ಬೇಡಿಕೊಂಡರು ಕರುಣೆಬಾರದೆ ನಿನಗೆ???
ಬಿಡುಗಡೆಯ ನೀಡೆನಗೆ ಚೆಲುವೆ,
ನಿನ್ನ ಮೋಹ ಜಾಲದ ವ್ಯೂಹದಿಂದ....

ನೊಂದು ಬೆಂದಿರುವೆ ನಾನು,
ಇಂದು ನಾಳೆಗಳ ಅರಿವಿಲ್ಲದೆ,
ಒಂದುಸಲವಾದರು ಹೇಳು ಪ್ರೀತಿಯಲಿ,
"ನೀ ನನಗೆ ಇಷ್ಟ"ವೆಂದು.....
ಅಷ್ಟೇ ಸಾಕೆನ್ನ ಪುಟ್ಟ ಹೃದಯಕೆ,
ಎಷ್ಟೇ ಜನುಮಗಳೆ ಸಾಗಲಿ,
ಕಾಯುವೆನು ನಿನಗಾಗಿ ತೆರೆದ ಮನಸಿಂದ,
ಸೇರಿಕೊಳ್ಳವೆ ನಿನ್ನ ಮುಗ್ದ ಪ್ರೇಮದಿಂದ...

ಮತ್ತೆ ವಾಲುತಿದೆ ಮನಸು...

ಮತ್ತೆ ವಾಲುತಿದೆ ಮನಸು ನಿನ್ನೆಡೆಗೆ,
ಏನು ಮೋಡಿಯೋ ಆ ಜೋಡಿ ಕಂಗಳಲಿ,
ಎತ್ತ ನೋಡಬೇಕೆನಿಸಿದರು ನನಗೆ,
ಸುತ್ತಲೂ ಆ ಎರಡು ಕಣ್ಣುಗಳೇ,
ಸತ್ತು ಬದುಕುತಿದೆ ಮನಸು ಮುತ್ತನಿಡಲು
ಆ ಜೋಡಿ ಕಂಗಳಿಗೆ.....

ನಡು ದಾರಿಯಲೂ ಕಾಣದಾಗಿದೆ ದಿಕ್ಕು,
ಕಡಲಂತೆ ಕಾಣುತಿದೆ ನಡೆವ ಹಾದಿ,
ಕಿಡಿಯೊಂದು ಹೊತ್ತಿದೆ ನಿನ್ನ ಕಣ್ಣುಗಳಿಂದ,
ಸುಡುತಿದೆ ಎನ್ನೊಡಲ ನುಡಿಯಲಾದೆನು ನಾ,
ಕೊಡುವೆನೊಂದು ಸಿಹಿ ಮುತ್ತನು
ಆ ಜೋಡಿ ಕಂಗಳಿಗೆ.....

ಮೆಲ್ಲ ಮೆಲ್ಲನೆ ನಲ್ಲನ ಕೊಲ್ಲುತಿವೆ ಕಣ್ಣುಗಳು,
ಮಲ್ಲಿಗೆಯ ಪರಿಮಳವು ಮಾಯವಾಗಿದೆ,
ಎಲ್ಲಿರುವೆನೋ ನಾನು ಅರಿವಿಲ್ಲವಾಗಿದೆ,
ಅಲ್ಲಿ ನೋಡಿದ ಆ ಜೋಡಿ ಕಣ್ಣುಗಳು,
ಎಲ್ಲ ಜಗವನು ಮರೆಸಿ ತನ್ನತ್ತ ಸೆಳೆದಿವೆ,
ಒಲ್ಲೆಯೆಂದರು ಒಮ್ಮೆ ಮುತ್ತನಿಡುವೆ
ಆ ಜೋಡಿ ಕಂಗಳಿಗೆ....

ಕೊನೆಯತನಕ...

ಅವಿತು ಕುಳಿತಿರುವೆ ನೀ ಮನದ ಆಳದಲಿ,
ಕವಿತೆ ಗೀಚಿರುವೆ ನಾ ಗಾಳಿಯ ಹಾಳೆಯಲಿ,
ಚಿರತೆಯ ವೇಗವಿದೆ ಈ ಪ್ರೀತಿಯ ಲೇಖನಿಯಲಿ,
ಕೊರತೆಯೇನಿದೆ ಹೇಳೇ ಗೆಳತಿ ನನ್ನ ಪ್ರೀತಿಯಲಿ?
ಒಮ್ಮೆ ಒಪ್ಪಿದರೆ ಸಾಕೆ ಬಿಡೆನಿನ್ನ ಕೊನೆಯತನಕ...

ಕಳೆದ ಕಾಲದ ಆ ಕಹಿ ನೆನಪುಗಳ
ಕಾಲಾಂತರಾಳದಲಿ ಕೊರೆದು ಅಡಗಿಸಿಡು,
ಕಳೆಯೋಣ ಬರುವ ಕಾಲವನು
ಕನಕದಂಬಾರಿಯಲಿ ಕುಳಿತು,
ಒಮ್ಮೆ ಒಪ್ಪಿದರೆ ಸಾಕೆ ಬಿಡೆನಿನ್ನ ಕೊನೆಯತನಕ...

ಕನಸ ಕಂಡಿಹೆನಂದು ನೀ ಒಪ್ಪಿದೆಯೆಂದು,
ಮನಸಲೆಂದೆಂದು ಅನಿಸಿಲ್ಲ ನನಸಾಗುವುದೆಂದು,
ಕನಸು ಕಾಣುವವನು ಕನಸುಗಾರ,
ಕನಸುಗಾರನು ನಾನಲ್ಲ, ಕನಸೆಂದು ಕಂಡಿಲ್ಲ ಗೆಳತಿ,
ಕನಸಲ್ಲೇ ಕಂಡೆ ನಾ ಸೌಂದರ್ಯ ರಾಶಿಯನು
ಒಪ್ಪಿಸಿಕೋ ನಿನ್ನ, ಅಪ್ಪುವೆನು ಚಿನ್ನ...
ಒಮ್ಮೆ ಒಪ್ಪಿದರೆ ಸಾಕೆ ಬಿಡೆನಿನ್ನ ಕೊನೆಯತನಕ...

ಕನ್ನಡತಿ....

ಕರುಣದಲಿ ನೋಡೆ ಕಮಲನಯನೆ,
ಕರುನಾಡ ಕನ್ನಡ ಕುವರ ನಾನಿರುವೆ,
ಹೊರನಾಡ ಹೊಲಸು ಹಂದಿಗಳೇಕೆ ನಿನಗೆ,
ಚರಣದಾಸಿಯಾಗಬೇಕಿಲ್ಲ ನನಗೆ, ಹರುಷದಿಂದಲಿ ಪ್ರೀತಿಯ
ಹೂರಣವ ಉಣಿಸಿದರೆ ಸಾಕು ಮುದ್ದು ಮನಕೆ...

ಬೆಳ್ಳನೆಯದೆಲ್ಲಾ ಎಂದಿಗೂ ಹಾಲಲ್ಲ.
ಬೆಳ್ಳಗೇ ಬೆಳಗುವುದು ತಿಳಿಯ ಸುಣ್ಣದ ನೀರು,
ಬೆಳ್ಳಿ ಬೆಳಕಿನ ಚಂದ್ರ ಕಡುಗತ್ತಲಲೇ
ಹೊಳೆಯುವನು, ಹಾಲ ಶರಧಿಯಲಿ ಅದು ಬರಿಯ ಬಿಂಬ,
ಬೆಣ್ಣೆ ಸುಣ್ಣದ ಅಂತರ ಅರಿತರೆ ಸಾಕು ಮುದ್ದು ಮನಕೆ...

ಕಡುಕಪ್ಪು ಬಣ್ಣವೇ ಕಠಿಣ ವಜ್ರದ್ದು,
ಕಡೆದು ತೀಡಿದಮೇಲೆ ಆಳದಲಿ ಸಿಗುವುದು,
ಕಡೆಗಣಿಸದಿರು ಕಪ್ಪೆಂದು ನನ್ನ,
ಕಡೆಗಳಿಯವರೆಗೂ ಕೊಡೆಯಡಿಯಲಿ ನಿನ್ನ
ಕೈಹಿಡಿದು ನಡೆಸುವೆ ಓ ಕನ್ನಡದ ಹೆಣ್ಣೇ,
ಕನ್ನಡವೇ ನನ್ನುಸಿರು ಕರುನಾಡು ಕಲ್ಪತರು,
ಇಚ್ಛೆಯಿಂದಲಿ ಸ್ವಚ್ಚ ಕನ್ನಡತಿ ನೀನಾದರೆ ಸಾಕು ಮುದ್ದು ಮನಕೆ...

ಕೊಲ್ಲುತಿವೆ ಕಣ್ಣುಗಳೆರಡು...

ಕವಿಯ ಮನಸನು ಕೊಲ್ಲುತಿವೆ ಕಣ್ಣುಗಳೆರಡು,
ಅರಿಯಲಾರೆನು ಹೊಳಪಿನ ಮೂಲವೇನೆಂದು,
ತಡೆಯಲಾರೆನು ನಾ ಸೆಳೆತದ ಆಳವನು,
ಮನದ ಭಾರವನಿಳಿಸಲು ಒಮ್ಮೆ ಕಣ್ಸನ್ನೆ ಮಾಡೆ ಗೆಳತಿ...

ಬೆಲ್ಲದ ಪಾಕದಲು ಕಲ್ಲು ಸಿಗಬಹುದು,
ಸುಳ್ಳಿಲ್ಲವೇ ಗೆಳತಿ ನನ್ನ ಪ್ರೀತಿಯಲಿ,
ಕಲ್ಲು ಮನದವರೂ ಕರಗಿ ನೀರಾದರು,
ಹೂವಂತೆ ಸೂಕ್ಷ್ಮ, ಜೇನಹನಿ ಈ ಪ್ರೀತಿ ಸವಿಯೇ ಗೆಳತಿ...

ಆಘಾತವಾಗಿದೆ ಒಂದು ಸಲ ಪುಟ್ಟ ಹೃದಯಕೆ,
ಬಲವಿಲ್ಲ ನನ್ನಲಿ ಮತ್ತೊಂದು ಆಘಾತ ತಡೆಯಲು,
ಬಿಟ್ಟು ಹೋಗದಿರು ನನ್ನ ಯಾವ ಸಂದರ್ಭದಲು,
ಬಿಟ್ಟು ಹೋದರೆ ಬಿಡುವೆನೀಜೀವ, ನನ್ನುಸಿರು ನೀನು ಗೆಳತಿ...

ಆಷಾಡ...

ಆಷಾಡದ ತಂಗಾಳಿ ಆಸೆಗಳ ಚಿಮ್ಮಿಸಲು,
ನವಜೋಡಿಯು ಅನುರಾಗದ
ಅಲೆಗಳನು ಅವಿತಿಟ್ಟು,
ವಿರಹದ ಬೇಗೆಯಲಿ ಪರಿಪರಿಯಲಿ ಬೆಂದು
ಶ್ರಾವಣದ ಆಗಮಕೆ ಕಾದಿರುವ
ಬಗೆಯನೇನೆಂದು ಹೇಳಲೇ ಒಲವ ಗೆಳತಿ... :)

ಆಷಾಡವಾಗಲಿ ವೈಶಾಖವಾಗಲಿ,
ಚೈತ್ರ ಶ್ರಾವಣಗಳೇ ಆಗಲಿ,
ಹುಣ್ಣಿಮೆಯು ಬರದೆಹೋಗುವುದೇನೆ?
ಸಾಗರವು ಉಕ್ಕದಿರುವುದೇನೆ?
ಪ್ರಕೃತಿಯ ಚಕ್ರದಲಿ ಅವಕಿಲ್ಲದ ಅಂತರ,
ಬೇಕೇ ನಮ್ಮಿಬ್ಬರ ನಡುವೆ? ಹೇಳೆಲೇ ಒಲವ ಗೆಳತಿ...

ಅವರಿವರ ಮಾತಿಗೆ ಕಿವಿಗೊಡದೆ,
ಹಿರಿಯರ ಸಲಹೆಯ ಸ್ವೀಕರಿಸಿ,
ಅರಿತ ಜೀವದ ಜೊತೆಗೆ,
ಬೆರೆಸಿ ಒಲವಿನ ಸವಿಯ,
ಬಡಿಸಿದ ಭೋಜನವ ಮಿತವಾಗಿ ಭುಜಿಸಿ,
ಹಿತವಾದ ಅನುರಾಗ ಅನುಭವಿಸಿ
ಪ್ರಕೃತಿಯಲೊಂದಾದರೆ ಸಾಲದೇ? ಹೇಳೆಲೇ ಒಲವ ಗೆಳತಿ...

ಹೊಂಬೆಳಕು...

ಅರಳುತಿದೆ ಮನದ ಮೂಲೆಯಲಿ
ಚಿಗುರೊಡೆದ ಸುಂದರ ಕನಸೊಂದು...
ಮರಳುಗಾಡಾದರು ನಿನ್ನ ನೆಲೆ,
ನನ್ನ ಕನಸಿಗೆ ನಿನ್ನ ಪ್ರೀತಿ, ಸಿಹಿನೀರಿನ ಸೆಲೆ..

ಎತ್ತ ನೋಡಲು ನಾನು
ಸುತ್ತಲೂ ನಿನ್ನದೆ ಛಾಯೆ,
ಮತ್ತಾಗಿಸುವುದಾದರು ನಿನ್ನ ಗುಣ,
ಮುತ್ತನುಣಿಸಿದೆ ಮುದ್ದು ಮನಕೆ...

ಚಿತ್ತ ಚಾಂಚಲ್ಯದಲಿ
ಭಿತ್ತಿ-ಹೊತ್ತಗೆಯಲ್ಲಿ
ಹೊತ್ತು ಮುಳುಗಿದರೂ
ನೆತ್ತಿ ನೇರಕಿರುವೆ ನೀ ಹೊಂಬೆಳಕಂತೆ...

ಸುಂದರಾಂಗಿ...

ಮುಗಿಲೊಂದು ಬಾನಿನಲಿ,
ತನಗ್ಯಾರು ಮಿಗಿಲೆಂದು
ಮೊಗದಲ್ಲಿ ನಗೆ ಹರಿಸಿರಲು,
ಇಂದ್ರಧನಸಿನ ಮೇಲಿಂದ  ಧರೆಗಿಳಿದೆ
ಸುರಗಂಗೆ ನೀನು ಸುಂದರಾಂಗಿ...

ಮರಳು ಹರಳಾಗಿ
ಥರ-ಥರದೆ ಹೊರಳಾಡಿ
ಚಿತ್ತಾರ ಬಿಡಿಸಿರೆ ಮರಳುಗಾಡಲಿ,
ಹರಳೆಂಬ ಮರಳನ್ನ ಹಿಡಿ-ಹಿಡಿದು
ಪೋಣಿಸಲು, ನೀನಾದೆ ಸುಂದರಾಂಗಿ.  


ಜೀವವಾಯುವ ಹರಿಸಿ,
ನೋವ ತನ್ನಲೆ ಇರಿಸಿ,
ಕಾವ ಕರದಲೆ ಉಳಿಸಿ,
ತಂಪನುಣಿಸುವ ಬಳ್ಳಿ ಬಡವಾಯ್ತು
ನಡೆದಾಡುವ ಬಳ್ಳಿ ನೀ ಸುಂದರಾಂಗಿ...

ಉತ್ತರದ ಕಡೆಯಿಂದ
ಎತ್ತರದ ನಾಡಿಂದ
ಬಿತ್ತರದ ಹಾದಿಯಲಿ
ನೆತ್ತರತ್ತಿತ್ತ ಚಿಮ್ಮಿಸಿ ಬರುತಿರಲು ನಾ,
ಕಂಡ ಬೆಳದಿಂಗಳೆ ನೀನಲ್ಲವೇ ಸುಂದರಾಂಗಿ???

ಸಪ್ತ ಸಾಗರಗಳೆಲ್ಲ
ಒಟ್ಟಾಗಿ ಸೇರಿದರು,
ಸುತ್ತ ಎತ್ತೆತ್ತಲೋ
ಸ್ವತ್ತು ಕರಗಿಸಿ ಹುಡುಕಿದರು
ಸಿಗದ ಸೌಂದರ್ಯ ನಿನ್ನದು ಸುರ ಸುಂದರಾಂಗಿ...

ನೆಪ...

ಕಾಲ ಕಿರುಬೆರಳ ಉಗುರ ಅಡಿಯಲ್ಲಿ,  
ಅಡಗಿರುವ ಸೌಂದರ್ಯ ರಾಶಿಯೇ,
ಉಗುರ ಕಡಿಯುವ ನೆಪದೆ
ಅಣು ಅಣುವಾಗಿ ಸವಿಯುವ ಬಯಕೆ ಎನ್ನ ತುಂಟ ಮನಕೆ...

ನುಣುಪು ಹಿಮ್ಮಡಿಯ ಮೇಲೆ,
ಕಾಣುವ ಕಣಕಾಲೇ,
ಧೂಳು ತೆಗೆಯುವ ನೆಪದೆ
ಕಾಲ್ಗೆಜ್ಜೆ ತೊಡಿಸುವ ಬಯಕೆ ಎನ್ನ ತುಂಟ ಮನಕೆ...

ಬಳುಕೊ ಸಿಂಹಿಣಿಯ ನಡುವೆ,
ನಡುವೆ ಏನಿಟ್ಟಿರುವೆ??
ಏನಿದೆಯೊ ಹುಡುಕುವ ನೆಪದೆ
ಉಡುಪೊಂದ ಉಡಿಸುವ ಬಯಕೆ ಎನ್ನ ತುಂಟ ಮನಕೆ...

ಹಂಸಪಕ್ಷಿಯ ಕೊರಳೆ,
ಕಂಠದಲು ಗಂಟಿಲ್ಲವೇನೇ?
ಆಳವ ಅಳೆವ ನೆಪದೆ
ವಜ್ರಹಾರವ ತೊಡಿಸುವ ಬಯಕೆ ಎನ್ನ ತುಂಟ ಮನಕೆ...

ಕಣ್ಣು ಕಮಲದ ಮೊಗ್ಗು, ಮೂಗು ಸಂಪಿಗೆ,
ತುಟಿಗಳೇನೆಂದು ಹೇಳಲೇ?
ಹೋಲಿಕೆಯ ಹೋಲಿಸುವ ನೆಪದೆ
ತುಟಿಗೆ ಮುತ್ತಿಡುವ ಬಯಕೆ ಎನ್ನ ತುಂಟ ಮನಕೆ...

ಮಂದಾರ ಪುಷ್ಪದ ಮೊಗದ, ಮಂದ ಮತಿ ಮುಗ್ದೆ,  
ನಗುವ ಮೇಲಿನ ನಾಸಿಕ, ನಯನಗಳ
ನೋಡುತಿಹ ನೊಸಲಿನ ನಟ್ಟ ನಡು ಮಧ್ಯದಲಿ,
ಸೌಭಾಗ್ಯದ ಸಿಂಧೂರವಿಡುವ ಬಯಕೆ ಎನ್ನ ಮುಗ್ದ ಮನಕೆ||

ಮನಸ್ಸು...

ನಿನ್ನಂತರಂಗವನು
ನೋಡಲೆನಗಿಲ್ಲ ದಿವ್ಯ ದೃಷ್ಟಿ,
ಆ ದೇವನು ಕೂಡ
ಅರಿಯಲಸಾಧ್ಯ ಹೆಣ್ಣಿನಮನ,
ಬಡ ಜೀವ ನಾನು, ಹೇಗೆ ಅರಿಯಲೇ ಗೆಳತಿ ನಿನ್ನ ಮನಸ್ಸು???

ಮತ್ಸ್ಯ ಕನ್ಯೆಯೇ ನೀನು?
ಹಿಂಬರುವೆ ಬಾಲೆ ನಿನ್ ಹೆಜ್ಜೆ ಹಿಡಿದು,
ಸರ್ಪ ಕನ್ಯೆಯೇ ನೀನು?
ಚಿತ್ತಾರ ಬಿಡಿಸುವೆ ನಿನ್ ಹೆಜ್ಜೆಯಲಿ ನಡೆದು,
ವೃಕ್ಷ ಕನ್ಯೆಯೇ ನೀನು?
ಸೇರುವೆ ನಿನ್ನ ಗಾಳಿಯ ದಿಕ್ಕಲಿ ನಡೆದು,
ಏನೆಲ್ಲಾ ಮಾಡಿದರು ಅರಿಯಲಾರೆನು ಗೆಳತಿ ನಿನ್ನ ಮನಸ್ಸು||

ಕಾಮಧೇನುವೆ ನೀನು?
ಕಾಮಿಸುವೆ ಒಂದು ವರ ಮನದೆ ನೆನೆದು,
ಸಿಂಹಿಣಿಯೆ ನೀನು?
ಮೃಗಾರಾಜನಾಗುವೆನು ನಿನ್ನೆಡೆಗೆ ಬಂದು,
ಕೋಗಿಲೆಯೆ ನೀನು?
ಕವಿಯಾಗಿ ಬೆರೆಸುವೆ ರಾಗದೊಂದಿಗೆ ಪದವ ಬರೆದು,
ಏನೆಲ್ಲಾ ಮಾಡಿದರು ಅರಿಯಲಾರೆನು ಗೆಳತಿ ನಿನ್ನ ಮನಸ್ಸು||

ಉಸಿರು...

ಬೆಳದಿಂಗಳಿರುಳಲ್ಲಿ, ಬೆಳ್ಳಿ ಮೋಡದ ಅಂಚಿನಲ್ಲಿ|
ತೆಳುಗಾಳಿ ಸುಳಿದಿರಲು ಹಿತವಾದ ಧರಣಿಯಲಿ||
ತಿಳಿ ಹಾಲ ಸಾಗರದಿ ಏರಿಳಿವ ಅಲೆ ಅಲೆಯಲಿ|
ನಿನ್ನೊಲುಮೆಯ ಸವಿಯ ಸವಿದೆ ಗೆಳತಿ..||

ಹುಚ್ಚು ಹಿಡಿಸುವ ಆ ನಿನ್ನ ಕಣ್ಣುಗಳು|
ಕಿಚ್ಚು ಹೊತ್ತಿಸಿದೆ ಮನದ ಮನೆಯೊಳಗೆ||
ಕೊಚ್ಚಿ ಹಾಕಿದೆ ಇನ್ನೋರ್ವ ಬಾಲೆಯ ಬಯಕೆ,
ಹಚ್ಚ ಹಸಿರನೆ ತೊಟ್ಟ ಬೆಡಗಿ|
ನಿನ್ನೊಲುಮೆಯ ಬಯಸಿ ಕಾದಿರುವೆ ಬಾರೆ ಗೆಳತಿ..||

ಮನದಾಳಾದೊಳಗೆ, ಅಡಿಯಿಂದ ಮುಡಿವರೆಗೆ|
ಕಣ್ಣೀರ ತೆರೆಯೊಳಗೆ, ಎದೆ ಬಡಿವವರೆಗೆ||
ನುಡಿಮುತ್ತಿನೊಳಗೆ, ಉಸಿರಿರುವವರೆಗೆ|
ನಿನ್ ಹೆಸರ ಬಿಗಿದಿಡುವೆ ಓ ಪ್ರೀತಿ!! ನೀ ನನ್ನ ಒಡತಿ...||

ಮುಗ್ದ ಮಂದಹಾಸ...

ಉದ್ದ ಮೊಗದ ಮುಗ್ದೆ ಯಾರೆ?
ಮುದ್ದು ಮಂದಹಾಸ ತೋರೆ,
ಮದ್ದು ಗುಂಡು ಬೇಡ ಬಾರೆ,
ಮುಗ್ದ ಮಂದಹಾಸ ಸಾಕೆ
ಮುದ್ದು ಮನಸ ಕೊಲ್ಲಲು...


ಪೆದ್ದನಾಗಿ ಬಿದ್ದೆನಲ್ಲೆ,
ಗುದ್ದಿಯಾದರೂನೂ ಕೊಲ್ಲೆ,
ಗೆದ್ದ ಮನವ ಅಳಿಸಲೊಲ್ಲೆ,
ಮುಗ್ದ ಮಂದಹಾಸ ಸಾಕೆ
ಮುದ್ದು ಮನಸ ಕೆಡಿಸಲು...


ಒದ್ದೆ ಮೈಗೆ ಚಳಿಯ ಹಾಳೆ,
ಎದ್ದು ಬಿದ್ದು ಬಂದೆ ಕೇಳೆ,
ಕದ್ದು ನೋಡೋ ಆಟ ನಿಲಿಸಿ
ಜಿದ್ದನೆಲ್ಲ ಮರೆಗೆ ಸರಿಸಿ,
ಮುಗ್ದ ಮಂದಹಾಸ ತೋರೆ
ಮುದ್ದು ಮನಸನುಳಿಸಲು....

ಮುದ್ದು ಮನಸು...

ಎಳೆ ಎಳೆಯಾಗಿ ಹೆಣೆದ,
ಎಳೆ ಮೊಗದ ನಿನ್ನಂದ,
ಇಳೆ ಮೇಲೆ ಕಂಡಾಗಿನಿಂದ,
ಅಲೆ ಅಲೆಯಾಗಿ ನುಲಿದಾಡುತಿದೆ ಈ ಮುದ್ದು ಮನಸು..

ಎಲೆ ಮೇಲಿನ ನೀರ ಬಿಂದು,
ತಿಳಿ ಮೊಗದಲಿ ಕಂಡೆ ಅಂದು,
ಹೊಳೆಯುತಲಿರುವ ನಿನ್ ಕಣ್ಣ ಕಂಡು,
ಅಲೆ ಅಲೆಯಾಗಿ ನುಲಿದಾಡುತಿದೆ ಈ ಮುದ್ದು ಮನಸು..

ಚಳಿ ರಾತ್ರಿಯಲಿ ಚಂದಿರನ ಕಂಡು,
ಬಿಳಿ ಹಾಲ ಹೊಳೆಯಲ್ಲಿ ಮಿಂದು,
ಬಳೆಗಳ ಸದ್ದಲಿ ಹದವಾಗಿ ಬೆಂದು,
ಬೆಳಗಾಗಲೆದ್ದು ಮೊಗವ ಮತ್ತೆ ಕಂಡು,
ಅಲೆ ಅಲೆಯಾಗಿ ನುಲಿದಾಡುತಿದೆ ಈ ಮುದ್ದು ಮನಸು..

ಹುಸಿಯಾದೆ ನೀನು...

ನೀರಲೆಯ ನೊರೆ ಮೇಲೆ ಮೆಲ್ಲ-ಮೆಲ್ಲನೆ ನಡೆವೆ,
ನೂರಾರು ಸಾಲುಗಳ ಒಂದೇ ಮಾತಲಿ ನುಡಿವೆ,
ಇನ್ಯಾರು ಬಂದರು ನಮಗಿಲ್ಲ ಇಂದು-ನಾಳೆಯ ಗೊಡವೆ,
ಕಣ್ಣೀರು ಸುರಿಸದಿರು ಉಳಿಸು ನನ್ನ, ಓ ಒಲವೆ,
ಹುಸಿಯಾದರೂ ನೀನು ಗೆಳತಿ, ಹಸಿ ಪ್ರೀತಿಯನೆ ನಾನು ಕೊಡುವೆ.

ಊರೆಲ್ಲ ಅಲೆದರು, ಮನದಲ್ಲಿ ನಿನ್ನ ಜಪ ಒಲವೆ,
ಕರೆಯಲ್ಲೂ ನೀನಿರುವೆ, ಕಾರಣವು ನಿನ್ನ ನಡುವೆ?
ಕೊರಳಲ್ಲೆ ಉಳಿದಿರುವೆ, ಕೋಪವಿರುವುದೆ ನಮ್ಮ ನಡುವೆ?
ಕರುಣೆಯಲೆ ಕನಿಕರಿಸೇ, ಮನದಾಳದಿಂದ ನಿನ್ನ ಕರೆವೆ,
ಹುಸಿಯಾದರೂ ನೀನು ಗೆಳತಿ, ಹಸಿ ಪ್ರೀತಿಯನೆ ನಾನು ಕೊಡುವೆ.