ಕಥಾನಾಯಕಿ...

ಮುದ್ದಾದ ಮನಸೊಂದು ಕಾದಿದೆ,
ಮನಬಿಚ್ಚಿ ಹಕ್ಕಿಯಂತೆ ಹಾರಿದೆ,
ಮನಸಿನ ಅಂಗಳಕೆ ಹಾರಿಬಂದು,
ಮನಸೊಳಗೆ ಬರಲು ಯೋಚಿಸುತಿದೆ...

ಒಲವೆಂಬ ಸೌಧವನು ಇಟ್ಟಿಗೆಯಿಲ್ಲದೆ ಕಟ್ಟಿದಳು,
ತಳದ ಪಾಯಕೆ ಪ್ರೀತಿಯ ಸುಧೆ ಹರಿಸಿದಳು,
ಕುಲದ ತಕರಾರು ಎಂದೂ ಬರದಿರಲಿ ಈ ಪ್ರೀತಿಯಲಿ,
ಛಲದೆ ನೆಲೆಯ ಸೇರೋಣ ಒಂದೇ ಮನಸಿನಲಿ,
ಒಲವ ಸೌಧದ ಅರಸಿ ಅರಗಿಣಿ ನೀನೆ,
ಒಲವ ಸವಿಯುವ ನಿನ್ನಿನಿಯ ನಾನೇ...

ಕಥೆಯ ಬರೆದಳು ಕಣ್ಣ ಸನ್ನೆಯಲಿ,
ಕಥಾನಾಯಕಿ ಅವಳು ನನ್ನ ಕನಸಿನಲಿ,
ಕಥೆಯ ಅಂತ್ಯ ಏನೇ ಇರಲಿ,
ಕಥೆಗೆ ನಾಯಕ ನಾನೇ, ಅವಳ ಕನಸಿನಲಿ,
ಕಥೆಯ ಪೂರ್ಣವಿರಾಮ ಅವಳ ಇಚ್ಛೆ....

ಮತ್ತೆ ವಾಲುತಿದೆ ಮನಸು...

ಮತ್ತೆ ವಾಲುತಿದೆ ಮನಸು ನಿನ್ನೆಡೆಗೆ,
ಏನು ಮೋಡಿಯೋ ಆ ಜೋಡಿ ಕಂಗಳಲಿ,
ಎತ್ತ ನೋಡಬೇಕೆನಿಸಿದರು ನನಗೆ,
ಸುತ್ತಲೂ ಆ ಎರಡು ಕಣ್ಣುಗಳೇ,
ಸತ್ತು ಬದುಕುತಿದೆ ಮನಸು ಮುತ್ತನಿಡಲು
ಆ ಜೋಡಿ ಕಂಗಳಿಗೆ.....

ನಡು ದಾರಿಯಲೂ ಕಾಣದಾಗಿದೆ ದಿಕ್ಕು,
ಕಡಲಂತೆ ಕಾಣುತಿದೆ ನಡೆವ ಹಾದಿ,
ಕಿಡಿಯೊಂದು ಹೊತ್ತಿದೆ ನಿನ್ನ ಕಣ್ಣುಗಳಿಂದ,
ಸುಡುತಿದೆ ಎನ್ನೊಡಲ ನುಡಿಯಲಾದೆನು ನಾ,
ಕೊಡುವೆನೊಂದು ಸಿಹಿ ಮುತ್ತನು
ಆ ಜೋಡಿ ಕಂಗಳಿಗೆ.....

ಮೆಲ್ಲ ಮೆಲ್ಲನೆ ನಲ್ಲನ ಕೊಲ್ಲುತಿವೆ ಕಣ್ಣುಗಳು,
ಮಲ್ಲಿಗೆಯ ಪರಿಮಳವು ಮಾಯವಾಗಿದೆ,
ಎಲ್ಲಿರುವೆನೋ ನಾನು ಅರಿವಿಲ್ಲವಾಗಿದೆ,
ಅಲ್ಲಿ ನೋಡಿದ ಆ ಜೋಡಿ ಕಣ್ಣುಗಳು,
ಎಲ್ಲ ಜಗವನು ಮರೆಸಿ ತನ್ನತ್ತ ಸೆಳೆದಿವೆ,
ಒಲ್ಲೆಯೆಂದರು ಒಮ್ಮೆ ಮುತ್ತನಿಡುವೆ
ಆ ಜೋಡಿ ಕಂಗಳಿಗೆ....

ಕೊಲ್ಲುತಿವೆ ಕಣ್ಣುಗಳೆರಡು...

ಕವಿಯ ಮನಸನು ಕೊಲ್ಲುತಿವೆ ಕಣ್ಣುಗಳೆರಡು,
ಅರಿಯಲಾರೆನು ಹೊಳಪಿನ ಮೂಲವೇನೆಂದು,
ತಡೆಯಲಾರೆನು ನಾ ಸೆಳೆತದ ಆಳವನು,
ಮನದ ಭಾರವನಿಳಿಸಲು ಒಮ್ಮೆ ಕಣ್ಸನ್ನೆ ಮಾಡೆ ಗೆಳತಿ...

ಬೆಲ್ಲದ ಪಾಕದಲು ಕಲ್ಲು ಸಿಗಬಹುದು,
ಸುಳ್ಳಿಲ್ಲವೇ ಗೆಳತಿ ನನ್ನ ಪ್ರೀತಿಯಲಿ,
ಕಲ್ಲು ಮನದವರೂ ಕರಗಿ ನೀರಾದರು,
ಹೂವಂತೆ ಸೂಕ್ಷ್ಮ, ಜೇನಹನಿ ಈ ಪ್ರೀತಿ ಸವಿಯೇ ಗೆಳತಿ...

ಆಘಾತವಾಗಿದೆ ಒಂದು ಸಲ ಪುಟ್ಟ ಹೃದಯಕೆ,
ಬಲವಿಲ್ಲ ನನ್ನಲಿ ಮತ್ತೊಂದು ಆಘಾತ ತಡೆಯಲು,
ಬಿಟ್ಟು ಹೋಗದಿರು ನನ್ನ ಯಾವ ಸಂದರ್ಭದಲು,
ಬಿಟ್ಟು ಹೋದರೆ ಬಿಡುವೆನೀಜೀವ, ನನ್ನುಸಿರು ನೀನು ಗೆಳತಿ...