ಎರಡು ಮನಗಳು...

ಎರಡೇ ದಿನ ಸಾಕೆನಗೆ ನಿನ್ನ ಮನವನರಿಯಲು,
ಎರಡು ಕ್ಷಣ ಸಾಕೆನಗೆ ನಿನ್ನ ಮನವೊಲಿಸಲು,
ಎರಡು ಮಾತು ಸಾಕೆನಗೆ ನಿನ್ನ ಈ ಜಗವ ಮರೆಸಲು,
ಎರಡು ಯೋಚನೆ ಏಕೆ ಗೆಳತಿ ಒಮ್ಮೆ ಸಮ್ಮತಿಸು,
ಎರಡು ಮನಗಳು ಒಂದಾಗಲಿ ಈ ಅಮೃತ ಘಳಿಗೆಯಲಿ...

ಎರಡು ಕಣ್ಣುಗಳಲ್ಲಿ ಮೊದಲಾಯಿತು ಮೊದಲ ಪ್ರೀತಿ,
ಎರಡು ತುಟಿಗಳು ಅರಿತು, ನಿವೇದಿಸಿದವು ನಿನ್ನಲಿ,
ಎರಡು ಕಣ್ಣೀರ ಹನಿ, ಕೋಪ ಕರಗಿಸುವ ರೀತಿ,
ಎರಡು ನೀರ ಹನಿ, ಜೀವ ಉಳಿಸುವ ರೀತಿ,
ಎರಡು ಮಾತನಾಡದೆಯೆ ಒಪ್ಪಿಕೋ ನೀನು ಒಲವ ಒಡತಿ...

ಎರಡು ಹುಸಿ ಮುನಿಸು ಬರುವುದು ಪ್ರೀತಿಯಲಿ,
ಎರಡೆರಡು ಮಾತಲ್ಲಿ ಚುಚ್ಚುವರು ಜಗದಲ್ಲಿ,
ಎರಡೇ ದಿನದ ಮುನಿಸು ಅರ್ಥವಾಗದೆ ನಿನಗೆ?
ಎರಡು ಸುಳ್ಳಾಡಲು ನೀನು ಎರಡು ದಿನದ ಕೋಪ ನನಗೆ,
ಎರಡಕ್ಷರದ ಪ್ರೀತಿ ಎಂದಿಗೂ ಸುಳ್ಳಲ್ಲ ಗೆಳತಿ,
ಜಗವೇ ಎರಡಾದರೂ, ಜೀವದಾಕಾರ ಅಳಿದರೂ,
ಗಾಳಿಯಲಿ ಬೆರೆತ ಉಸಿರಲ್ಲೇ ಪ್ರೀತಿಸುವೆ ನಿನ್ನ ನಾನು....

ಕರಗುತಿದೆ ಹರೆಯ....

ಆಗಬೇಕಿದೆ ಕನಸುಗಳ ವಿನಿಮಯ,
ಎಂದು ಬರುವುದು ಗೆಳತಿ ಆ ಸವಿ ಸಮಯ,
ಒಂದು ಸಲ ಆಗಿ ಬಿಡಲೇ ನಾ ನಿನ್ನ ಇನಿಯ,
ಒಲವು ಮೂಡಿದ ಘಳಿಗೆ ಮಧುರ ಪ್ರಣಯ....

ಭಾಷೆ ಬೇಕಿಲ್ಲ ಕಣ್ಣುಗಳು ಹೇಳುತಿವೆ ವಿಷಯ,
ಖಚಿತವಿದು ಪ್ರೇಮ ನನಗಿಲ್ಲ ಸಂಶಯ,
ಸಾಲಾಗಿ ಹೇಳೆ ಗೆಳತಿ ಏನು ನಿನ್ನ ಆಶಯ,
ಕೊಂಚವೂ ಸುಳ್ಳಿಲ್ಲ ತೀರಿಸುವೆ ನಿನ್ನೆಲ್ಲ ಬಯಕೆಯ...

ತಡ ಮಾಡದೆ ಬಾ ಉರುಳುತಿದೆ ಸಮಯ,
ಒಂದಾಗೋಣ ಬಾ ಕರಗುವ ಮುನ್ನ ಹರೆಯ,
ದೂರಕ್ಕೆ ಸೇರಿಸು ಸಂಶಯದ ತೆರೆಯ,
ಖಾತರಿಯು ಬೇಕಿಲ್ಲ ನಾನೇ ನಿನ್ನ ಇನಿಯ,
ಸಕ್ಕರೆಯ ಉಣಿಸುವೆ ನಾಳಿನ ಬಾಳಿನಲಿ
ಸಹಿಸಿಕೊ ಗೆಳತಿ ನನ್ನೆಲ್ಲ ಪ್ರೀತಿಯ,
ಮತ್ತೆ ದೊರಕದು ನಿನಗೆ ಈ ನನ್ನ ಸಮಯ...

ಹೋಲಿಕೆ...

ಕೇಳುವವರ್ಯಾರಿಲ್ಲ ಕಣ್ಣುಗಳ ಕಂಪನವ,
ಕೇಳಿಸದೆ ಗೆಳತಿ ನನ್ನೆದೆಯ ಕೂಗು..??
ಆಲಿಸುವ ಕಿವಿಗಳು ಕಿವುಡಾದವೇಕೆ???
ಹೋಲಿಸಲು ಸಿಕ್ಕಿತೇ ಮತ್ತೊಂದು ಮನಸು....????

ಹೋಲಿಕೆಯ ಮಾಡದಿರು ಯಾವುದೇ ವಿಷಯದಲಿ...
ನಾ ಬೇರೆ ಅವ ಬೇರೆ, ಹೋಲಿಕೆಯು ಸಲ್ಲದು...
ಅವನಾಗಿ ಪ್ರೀತಿಸಲು ನಾನು ಅವನಲ್ಲ...
ನಾನು ನಾನಾಗಿ ಪ್ರೀತಿಸುವೆ ನನ್ನ ಮನಸಾರೆ...

ಉಡುಗೊರೆಯ ಕೊಡಲಾರೆ ಬಡವ ನಾನು,
ನಿನ್ನಂದ ಬಣ್ಣಿಸಿ ನಿನ್ನ ಮೆಚ್ಚಿಸಲಾರೆ,
ಮೂಕನಾಗುವೆ ನಾನು ನಿನ್ನ ಕಂಡ ಕ್ಷಣವೇ...
ಕಪಟವಿಲ್ಲದ ಪ್ರೀತಿ ಅರಿತು ಪ್ರೀತಿಸು ಗೆಳತಿ...
ಸಾವಿನಲು ಜೊತೆಬರುವೆ ತುಂಬು ಹೃದಯದಿಂದ...

ಚರಣದಾಸಿ...

ಮಾಸಿದವು ಆಸೆಗಳು ಮೋಸದಾಟದಲಿ,
ಮಸಿಯ ಬಳಿದಿರಿ ನೀವ್ ಮುಗ್ದ ಹೃದಯಕೆ||

ಹಸಿಯ ಜೀವಕೆ ಏಕೆ ಹುಸಿಯ ಉಣ ಬಡಿಸಿದಿರಿ?
ಹಸುವಿನಂತೆಯೇ ಇದ್ದು, ಕಸಿಯ ಮಡಿಲೊಳಗಿಟ್ಟು,
ಕಸಿದುಕೊಂಡಿರವಳ ನಗೆ ಉಸಿರು ನಿಲ್ಲುವವರೆಗೆ||

ಘಾಸಿಯರಿವಿಲ್ಲ ಹುಸಿ ಸಿರಿಯ ಮೋಸದರಸರಿಗೆ,
ನುಸಿಯ ಕೀಟಗಳಂತಾಕ್ರಮಿಸಿ,
ಗಸಿಯ ಮಾಡಿದಿರವಳ ಹೊಂಬಾಳ ಕಣವೆಲ್ಲವನ್ನು||

ಹೊಸಿಲ ದಾಟಿಸಿ ನೀವ್ ಬಸಿರ ಬಗೆವುದು ಸರಿಯೇ?
ದಾಸಿಯಂತೆಣಿಸಿದಿರಿ ಬಾಳ ಹಾದಿಯಲಿ,
ಮಸೆದಿರವಳಾಸೆಗಳ ಅಣು ಅಣುಗಳಾಗಿ||

ಹಸಿಮನದ ಹುಸಿಯರಿಯದ ಮಾನಸಿ,
ಕುಸಿದು ಇಳೆಗಿಳಿದಳು ಆ ಸೌಂದರ್ಯ ರಾಸಿ,
ನಿಸಿಯಲ್ಲೇ ಹುಸಿಯಾದಳು ಆಕೆ, ಚರಣದಾಸಿ...

ತುಂಟ ಬೆರಳು...

ತೆವಳುತಿದೆ ತೋರ್ಬೆರಳ ತುದಿ
ಅಂಗನೆಯ ಮುಂಗುರುಳ ಬಳಿಗೆ,
ಸುರುಳಿಯಾಗಿಸಿಯದನು ಇಳಿಯುತಿದೆ
ಹೊಳೆವ ಕಣ್ಣುಗಳ ಕಡೆಗೆ...

ಮೀನಾಕ್ಷಿಯವಳ ಕಣ್ಣುಗಳ ಚುಂಬಿಸಲು
ಸದ್ದಿಲ್ಲದೆ ಸಾಗಿದೆ ಅಧರದೆಡೆಗೆ,
ತೊಂಡೆ ತುಟಿಗಳನೊಮ್ಮೆ ಚಿವುಟಿರಲು ಆ ಬೆರಳು,
ಮೇಲೇರಿತು ಅವಳ ಹುಬ್ಬು,
ತುಟಿಗೆ ತುಟಿಯೊತ್ತಿ ಮುತ್ತಿಡಲು ಬರಿಯ ಮೌನ...

ಕೊರಳಿಂದ ಕೆಳಗಿಳಿಯೆ ಬೆರಳು, ಕೇಳಿತು...
ನನ್ನೇಕೆ ಮರೆತೆ ಇನಿಯನೆ? ನಾಗೈದ ಅಪರಾಧವೇನು???
ಹೇಗೆ ಮರೆಯಲೆ ನಿನ್ನ??? ಇದೋ ನಿನಗಾಗಿ
ಮುತ್ತುಗಳ ಹಾರ, ಮತ್ತದೇ ಸ್ನಿಗ್ಧ ಮೌನ...

ಎದೆಗೂಡ ನಡುವೆ ನುಸುಳಿ ನುಗ್ಗಿ
ನಡುವ ತಲುಪಿದೆ ಬೆರಳು,
ಒಂದರಿಂದಾಗದು ಎಂದು ಎರಡು ಕೈಯಲಿ
ನಡುವ ನವಿರಾಗಿ ಹಿಡಿದಿರಲು,
ಮತ್ತದೇ ಮೌನ ಅವಳ ಮೊಗದಲ್ಲಿ...
ಹಿಡಿತ ಬಿಗಿಯಾಗಿಸಿ, ನಾಭಿಗೆ ಬಿಸಿಯುಸಿರ ಸೋಕಿಸಿ,
ನಡುವ ಮಧ್ಯದಲಿ ಮುತ್ತೊಂದ ಮೆತ್ತಗೆ ಕೊಡಲು,
ನಾಚಿ ನುಡಿದಳು ನನ್ನಾಕೆ,
ನಿಲ್ಲಿಸೆಯಾ ಇನಿಯ ತುಂಟ ಬೆರಳಿನಾಟವನಿಂದು???

ಹನಿ...

ಮೊದಲ ಮಳೆಯ ಮೊದಲ ಹನಿಯೇ,
ಕೆನ್ನೆ ಮೇಲೆ ಕ್ಷಣವು ಹೊಳೆದು,
ಮನದ ಆಳಕೆ ಮೆಲ್ಲನಿಳಿದು,
ತೊದಲ ಪ್ರೀತಿಗೆ ಹುಟ್ಟು ನೀಡಿದೆಯಲ್ಲೇ,
ವಿವರಣೆಯನಾರು ಹೇಳ್ವರು ನನ್ನ ಪುಟ್ಟ ಮನಸಿಗೆ...

ಮನದೆ ಇಳಿದ ಮೊದಲ ಹನಿಯೇ,
ಮೊಳೆತ ಜೀವಕೆ ಉಸಿರ ನೀಡು,
ಉಸಿರಿಗೊಂದು ಹೆಸರ ಹೇಳು,
ಹೊಸ ಭಾವದ ಪಿಸು ಮಾತಿಗೆ,
ಸೋತಿರುವುದು ನನ್ನೆದೆಯು,
ಹೆಸರಿನ ಗಾಢಾರ್ಥ ಹೇಳು ನನ್ನ ಪುಟ್ಟ ಮನಸಿಗೆ...

ನಿನ್ನ ತುಟಿಯ ಜೇನ ಹನಿಯು,
ಸವಿಯುವಾಸೆ ಹಗಲಿರುಳು,
ಸೋತ ಎದೆಗೆ ಸ್ವಂತವಾಗಿ,
ಚಿಂತೆ-ಸಂತೆ ದೂರ ಮಾಡಿ,
ಅಂತರಾಳದೊಲವಿನಿಂದ,
ಮಧುವನದಲಿ ಮಧು ಉಣಿಸು ನನ್ನ ಪುಟ್ಟ ಮನಸಿಗೆ...

ಪ್ರೀತಿಯ ಓಲೆ...

ನಿನ್ನ ಮೊಗ ನೋಡಲಾರೆನು ನಾನು,
ದೂರವಿರು ನನ್ನಿಂದ...
ಕರಗಿ ಕೆಳಗಿಳಿಯೇ ಕಂಗಳಂಚಿಂದ
ಕಣ್ಣೀರ ಹನಿಯಾಗಿ ಮನದಾಳದಿಂದ....

ಕಣ್ಣ ಮುಚ್ಚಲು ನಾನು,
ನನ್ನೆದರು ನೀನು,
ಬೇಡವೆಂದೆಷ್ಟು ಸಲ ದೂಡಲಿ ನಿನ್ನ,
ಬೇಡನಂತೇಕೆ ಬೇಟೆಯಾಡುವೆ ನನ್ನ,
ಬೇಡಿಕೊಂಡರು ಕರುಣೆಬಾರದೆ ನಿನಗೆ???
ಬಿಡುಗಡೆಯ ನೀಡೆನಗೆ ಚೆಲುವೆ,
ನಿನ್ನ ಮೋಹ ಜಾಲದ ವ್ಯೂಹದಿಂದ....

ನೊಂದು ಬೆಂದಿರುವೆ ನಾನು,
ಇಂದು ನಾಳೆಗಳ ಅರಿವಿಲ್ಲದೆ,
ಒಂದುಸಲವಾದರು ಹೇಳು ಪ್ರೀತಿಯಲಿ,
"ನೀ ನನಗೆ ಇಷ್ಟ"ವೆಂದು.....
ಅಷ್ಟೇ ಸಾಕೆನ್ನ ಪುಟ್ಟ ಹೃದಯಕೆ,
ಎಷ್ಟೇ ಜನುಮಗಳೆ ಸಾಗಲಿ,
ಕಾಯುವೆನು ನಿನಗಾಗಿ ತೆರೆದ ಮನಸಿಂದ,
ಸೇರಿಕೊಳ್ಳವೆ ನಿನ್ನ ಮುಗ್ದ ಪ್ರೇಮದಿಂದ...

ಸುಳಿ...

ಸುಳಿದಾಡದಿರು ಗೆಳತಿ ಎನ್ನೆದೆಯ ಅಂಗಳದಲಿ,
ಸುಳಿವು ನೀಡದೆಯೆ ಬಂದು ಸೇರಿದೆ ನನ್ನೊಳಗೆ,
ಸುಳಿಯೊಳಗೆ ಸಿಲುಕಿಸಿಯೇಕೆ ದೂರ ಸರಿದೆ???

ಸೆಳೆವೆ ಕಣ್ಣುಗಳೆರಡು ಆ ನಿನ್ನ ಮೊಗದಲಿ,
ಹೊಳೆವ ಕಣ್-ಕಾಂತಿಯನೇನೆಂದು ಬಣ್ಣಿಸಲಿ,
ಮಳೆ, ಮಿಂಚು ಸಿಡಿಲುಗಳೆಲ್ಲ ಆ ಕಣ್ಣುಗಳಂಚಿನಲಿ,
ಇಳೆಗಿಳಿದು ಪ್ರೀತಿಸಿದೆ ಆ ಜೋಡಿ ಕಂಗಳಿಗಾಗಿ,
ಸುಳಿಯೊಳಗೆ ಸಿಲುಕಿಸಿಯೇಕೆ ದೂರ ಸರಿದೆ????

ಹಲವಾರು ದಿನರಾತ್ರಿಗಳ ಕನಸಿನಲಿ,
ಒಲವ ಪ್ರತಿಮೆಯನಿಟ್ಟು ಮನದ ಗುಡಿಯಲಿ,
ನಲಿವ ದುಂಡು ಮಲ್ಲಿಗೆಯ ಹೂಗಳಲಿ,
ಅರ್ಚಿಸಿ ಪೂಜಿಸಿದೆ ಗೆಳತಿ ನಿನ್ನ ಪ್ರತಿಮೆಯನು,
ಸುಳಿಯೊಳಗೆ ಸಿಲುಕಿಸಿಯೇಕೆ ದೂರ ಸರಿದೆ????

ಚಲಿಸೋ ಮೋಡಗಳು...

ಜಾರಿಹೋದ ಸಮಯದಲ್ಲಿ ಹಾರಿಹೋದ ಹಕ್ಕಿಗಳು,
ಓಡಿಬರುವ ಸಮಯದಲಿ ಮೋಡಿಮಾಡೋ ಹಕ್ಕಿಗಳು,
ನೋಡಿ ನೋಡಿ ಸಾಕಾಯಿತು ಈ ಸಮಯದ ಆಟಗಳು,
ಹೋದವೆಷ್ಟೋ ಬಂದವೆಷ್ಟೋ ಲೆಕ್ಕ ಇತ್ತ ಭೂಪನಾರು?
ಎಲ್ಲವೂ ಕಣ್ಣಮುಂದೆ ಬರಿಯ ಚಲಿಸೋ ಮೋಡಗಳು... ಚಲಿಸುವಾ ಮೋಡಗಳು...||

ನೋಡೋ ನೋಟ ಬೇರೆ ಬೇರೆ, ಇರುವುದೆರಡು ಕಣ್ಣುಗಳು,
ಹಿಂದೆ ಒಂದು, ಮುಂದೆ ಒಂದು ಮಾತನಾಡೋ ಹಕ್ಕಿಗಳು,
ಬಿಟ್ಟ ಕೆಟ್ಟ, ಕೆಟ್ಟು ಬಿಟ್ಟ, ಬಿಟ್ಟು ಕೆಟ್ಟ ಅನುಭವಗಳು,
ಆದವೆಷ್ಟೋ ಹೋದವೆಷ್ಟೋ ಲೆಕ್ಕ ಇತ್ತ ಭೂಪನಾರು?
ಎಲ್ಲವೂ ಕಣ್ಣಮುಂದೆ ಬರಿಯ ಚಲಿಸೋ ಮೋಡಗಳು... ಚಲಿಸುವಾ ಮೋಡಗಳು...||

ಧುಮುಕುವಾ ಜರಿ-ತೊರೆಗಳು, ಹರಿಯುವಾಗ ನದಿಗಳು,
ಒಮ್ಮೆ ಹಾರಿ, ಒಮ್ಮೆ ತೆವಳೋ ಚಾಣಕ್ಷ ಹಕ್ಕಿಗಳು,
ಕಲಿತ ಮರೆತ, ಕಲಿತು ಮರೆತ, ಮರೆತು ಕಲಿತ ಪಾಠಗಳು,
ಕಾಲನೊಬ್ಬ ಮಾಯಗಾರ ಕಲಿಸುವುವಂತ ಪಾಠಗಳು,
ಕಲಿತದೆಷ್ಟೋ, ಮರೆತದೆಷ್ಟೋ ಲೆಕ್ಕ ಇತ್ತ ಭೂಪನಾರು?
ಎಲ್ಲವೂ ಕಣ್ಣಮುಂದೆ ಬರಿಯ ಚಲಿಸೋ ಮೋಡಗಳು... ಚಲಿಸುವಾ ಮೋಡಗಳು...||

ಕರುನಾಡು...

ಕಟುವಾದ ಕಲ್ಲಿನ ಕಂಬದಲು,
ಹಿತವಾದ ನಾದ ಹೊಮ್ಮುವುದು
ನಮ್ಮ ಕರುನಾಡಿನಲಿ....

ಬೆಟ್ಟ-ಗುಡ್ಡಗಳೆ ಅಡಗಿರಲು
ಸಹ್ಯಾದ್ರಿಯೊಡಲಿನಲಿ, ಹಸಿರೆ ಉಸಿರಾಗಿದೆ
ನಮ್ಮ ಕರುನಾಡಿನಲಿ....

ಕಾವ ತಡೆದರು ತಾಯಿ ಕಾವೇರಿ,
ಬೇಡಿದ ಭಟ್ಟಂಗಿಗಳಿಗೆಲ್ಲಾ ನೀರುಣಿಸುವಳು
ನಮ್ಮ ಕರುನಾಡಿನಲಿ...

ಸುಡು ಬಿಸಿಲೊಳು ಬೆಂದರು ನಮ್ಮ ಜನ,
ಬರುವ ಬೇವರ್ಸಿಗಳಿಗೆ ಅನ್ನ-ಆಶ್ರಯವ ಕೊಡುವರು
ನಮ್ಮ ಕರುನಾಡಿನಲಿ...

ಕಂಪು ಕನ್ನಡ ಗಾಳಿ ಉಸಿರೊಳಗೆ ಬೆರೆತಿರಲು,
ಕರುನಾಡೇ ನನ್ನ ನೆಲೆ, ಕಾವೇರಿ ತಾಯಿ,
ಕನ್ನಡವೇ ತಾಯ್ನುಡಿಯು,  ಕನ್ನಡತಿ ಎನ್ನೊಡತಿ,
ಮರೆತು ನಡೆದರೆ ನಾನು, ಮಸಣದಲಿ
ಮಸಿಯಾಗಿಸು ನನ್ನ, ತಾಯೆ ಕನ್ನಡಾಂಬೆ...

ಮತ್ತೆ ವಾಲುತಿದೆ ಮನಸು...

ಮತ್ತೆ ವಾಲುತಿದೆ ಮನಸು ನಿನ್ನೆಡೆಗೆ,
ಏನು ಮೋಡಿಯೋ ಆ ಜೋಡಿ ಕಂಗಳಲಿ,
ಎತ್ತ ನೋಡಬೇಕೆನಿಸಿದರು ನನಗೆ,
ಸುತ್ತಲೂ ಆ ಎರಡು ಕಣ್ಣುಗಳೇ,
ಸತ್ತು ಬದುಕುತಿದೆ ಮನಸು ಮುತ್ತನಿಡಲು
ಆ ಜೋಡಿ ಕಂಗಳಿಗೆ.....

ನಡು ದಾರಿಯಲೂ ಕಾಣದಾಗಿದೆ ದಿಕ್ಕು,
ಕಡಲಂತೆ ಕಾಣುತಿದೆ ನಡೆವ ಹಾದಿ,
ಕಿಡಿಯೊಂದು ಹೊತ್ತಿದೆ ನಿನ್ನ ಕಣ್ಣುಗಳಿಂದ,
ಸುಡುತಿದೆ ಎನ್ನೊಡಲ ನುಡಿಯಲಾದೆನು ನಾ,
ಕೊಡುವೆನೊಂದು ಸಿಹಿ ಮುತ್ತನು
ಆ ಜೋಡಿ ಕಂಗಳಿಗೆ.....

ಮೆಲ್ಲ ಮೆಲ್ಲನೆ ನಲ್ಲನ ಕೊಲ್ಲುತಿವೆ ಕಣ್ಣುಗಳು,
ಮಲ್ಲಿಗೆಯ ಪರಿಮಳವು ಮಾಯವಾಗಿದೆ,
ಎಲ್ಲಿರುವೆನೋ ನಾನು ಅರಿವಿಲ್ಲವಾಗಿದೆ,
ಅಲ್ಲಿ ನೋಡಿದ ಆ ಜೋಡಿ ಕಣ್ಣುಗಳು,
ಎಲ್ಲ ಜಗವನು ಮರೆಸಿ ತನ್ನತ್ತ ಸೆಳೆದಿವೆ,
ಒಲ್ಲೆಯೆಂದರು ಒಮ್ಮೆ ಮುತ್ತನಿಡುವೆ
ಆ ಜೋಡಿ ಕಂಗಳಿಗೆ....

ಕನ್ನಡತಿ....

ಕರುಣದಲಿ ನೋಡೆ ಕಮಲನಯನೆ,
ಕರುನಾಡ ಕನ್ನಡ ಕುವರ ನಾನಿರುವೆ,
ಹೊರನಾಡ ಹೊಲಸು ಹಂದಿಗಳೇಕೆ ನಿನಗೆ,
ಚರಣದಾಸಿಯಾಗಬೇಕಿಲ್ಲ ನನಗೆ, ಹರುಷದಿಂದಲಿ ಪ್ರೀತಿಯ
ಹೂರಣವ ಉಣಿಸಿದರೆ ಸಾಕು ಮುದ್ದು ಮನಕೆ...

ಬೆಳ್ಳನೆಯದೆಲ್ಲಾ ಎಂದಿಗೂ ಹಾಲಲ್ಲ.
ಬೆಳ್ಳಗೇ ಬೆಳಗುವುದು ತಿಳಿಯ ಸುಣ್ಣದ ನೀರು,
ಬೆಳ್ಳಿ ಬೆಳಕಿನ ಚಂದ್ರ ಕಡುಗತ್ತಲಲೇ
ಹೊಳೆಯುವನು, ಹಾಲ ಶರಧಿಯಲಿ ಅದು ಬರಿಯ ಬಿಂಬ,
ಬೆಣ್ಣೆ ಸುಣ್ಣದ ಅಂತರ ಅರಿತರೆ ಸಾಕು ಮುದ್ದು ಮನಕೆ...

ಕಡುಕಪ್ಪು ಬಣ್ಣವೇ ಕಠಿಣ ವಜ್ರದ್ದು,
ಕಡೆದು ತೀಡಿದಮೇಲೆ ಆಳದಲಿ ಸಿಗುವುದು,
ಕಡೆಗಣಿಸದಿರು ಕಪ್ಪೆಂದು ನನ್ನ,
ಕಡೆಗಳಿಯವರೆಗೂ ಕೊಡೆಯಡಿಯಲಿ ನಿನ್ನ
ಕೈಹಿಡಿದು ನಡೆಸುವೆ ಓ ಕನ್ನಡದ ಹೆಣ್ಣೇ,
ಕನ್ನಡವೇ ನನ್ನುಸಿರು ಕರುನಾಡು ಕಲ್ಪತರು,
ಇಚ್ಛೆಯಿಂದಲಿ ಸ್ವಚ್ಚ ಕನ್ನಡತಿ ನೀನಾದರೆ ಸಾಕು ಮುದ್ದು ಮನಕೆ...