ಕ್ಷಣ-ಕ್ಷಣ...

ಹೇಳಬೇಕೆನಿಸಿದೆ ಗೆಳತಿ ಸವಿಯಾದ ಮಾತೊಂದ,
ಕೇಳಲೊಂದು ಕ್ಷಣ ಕಿವಿಗೊಡುವೆಯಾ ನೀನು???
ಕಪ್ಪು-ಬಿಳುಪಿನ ಕನಸಿನಲಿ ಬಣ್ಣಗಳ ಹೋಳಿಯಾಟ,
ಬಣ್ಣಗಳ ಬದುಕಿನಲಿ ಕತ್ತಲೆಯ ಕ್ರೂರ ನೋಟ...

ಕೇಳಬೇಕೆನಿಸಿದೆ ಗೆಳತಿ ನಿನ್ನ ಮನಸಿನ ಮಾತೊಂದ,
ಬಳಿಬರುವೆ ಬಳಿಗೆ ಸೆಳೆವೆ, ಪ್ರೀತಿಸಲು ನೀನು....
ಗುಡುಗು ಸಿಡಿಲುಗಳೆ ತುಂಬಿವೆ ನಿನ್ನ ಮನದಾಳದಲೆಲ್ಲ,
ಮಿಂಚಂತೆ ಮರೆಯಾದೆ ಕಣ್ಣೋಟದಿಂದ....

ನೋಡಬೇಕೆನಿಸಿದೆ ಗೆಳತಿ ನಿನ್ನನೊಂದು ಕ್ಷಣ,
ಇನ್ನೆಷ್ಟು ದಿನ ಈ ತೆರೆಮರೆಯ ಆಟ???
ಸೋತು ಸೊರಗಿದೆ ಮನಸು ನಿನ್ನ ಈ ಆಟದಲಿ,
ಸಾವೊಂದೇ ಸುಖವೆನಿಸಿದೆ ನೀನಿಲ್ಲದ ಪ್ರತಿಘಳಿಗೆ....

ಚರಣದಾಸಿ...

ಮಾಸಿದವು ಆಸೆಗಳು ಮೋಸದಾಟದಲಿ,
ಮಸಿಯ ಬಳಿದಿರಿ ನೀವ್ ಮುಗ್ದ ಹೃದಯಕೆ||

ಹಸಿಯ ಜೀವಕೆ ಏಕೆ ಹುಸಿಯ ಉಣ ಬಡಿಸಿದಿರಿ?
ಹಸುವಿನಂತೆಯೇ ಇದ್ದು, ಕಸಿಯ ಮಡಿಲೊಳಗಿಟ್ಟು,
ಕಸಿದುಕೊಂಡಿರವಳ ನಗೆ ಉಸಿರು ನಿಲ್ಲುವವರೆಗೆ||

ಘಾಸಿಯರಿವಿಲ್ಲ ಹುಸಿ ಸಿರಿಯ ಮೋಸದರಸರಿಗೆ,
ನುಸಿಯ ಕೀಟಗಳಂತಾಕ್ರಮಿಸಿ,
ಗಸಿಯ ಮಾಡಿದಿರವಳ ಹೊಂಬಾಳ ಕಣವೆಲ್ಲವನ್ನು||

ಹೊಸಿಲ ದಾಟಿಸಿ ನೀವ್ ಬಸಿರ ಬಗೆವುದು ಸರಿಯೇ?
ದಾಸಿಯಂತೆಣಿಸಿದಿರಿ ಬಾಳ ಹಾದಿಯಲಿ,
ಮಸೆದಿರವಳಾಸೆಗಳ ಅಣು ಅಣುಗಳಾಗಿ||

ಹಸಿಮನದ ಹುಸಿಯರಿಯದ ಮಾನಸಿ,
ಕುಸಿದು ಇಳೆಗಿಳಿದಳು ಆ ಸೌಂದರ್ಯ ರಾಸಿ,
ನಿಸಿಯಲ್ಲೇ ಹುಸಿಯಾದಳು ಆಕೆ, ಚರಣದಾಸಿ...

ತುಂಟ ಬೆರಳು...

ತೆವಳುತಿದೆ ತೋರ್ಬೆರಳ ತುದಿ
ಅಂಗನೆಯ ಮುಂಗುರುಳ ಬಳಿಗೆ,
ಸುರುಳಿಯಾಗಿಸಿಯದನು ಇಳಿಯುತಿದೆ
ಹೊಳೆವ ಕಣ್ಣುಗಳ ಕಡೆಗೆ...

ಮೀನಾಕ್ಷಿಯವಳ ಕಣ್ಣುಗಳ ಚುಂಬಿಸಲು
ಸದ್ದಿಲ್ಲದೆ ಸಾಗಿದೆ ಅಧರದೆಡೆಗೆ,
ತೊಂಡೆ ತುಟಿಗಳನೊಮ್ಮೆ ಚಿವುಟಿರಲು ಆ ಬೆರಳು,
ಮೇಲೇರಿತು ಅವಳ ಹುಬ್ಬು,
ತುಟಿಗೆ ತುಟಿಯೊತ್ತಿ ಮುತ್ತಿಡಲು ಬರಿಯ ಮೌನ...

ಕೊರಳಿಂದ ಕೆಳಗಿಳಿಯೆ ಬೆರಳು, ಕೇಳಿತು...
ನನ್ನೇಕೆ ಮರೆತೆ ಇನಿಯನೆ? ನಾಗೈದ ಅಪರಾಧವೇನು???
ಹೇಗೆ ಮರೆಯಲೆ ನಿನ್ನ??? ಇದೋ ನಿನಗಾಗಿ
ಮುತ್ತುಗಳ ಹಾರ, ಮತ್ತದೇ ಸ್ನಿಗ್ಧ ಮೌನ...

ಎದೆಗೂಡ ನಡುವೆ ನುಸುಳಿ ನುಗ್ಗಿ
ನಡುವ ತಲುಪಿದೆ ಬೆರಳು,
ಒಂದರಿಂದಾಗದು ಎಂದು ಎರಡು ಕೈಯಲಿ
ನಡುವ ನವಿರಾಗಿ ಹಿಡಿದಿರಲು,
ಮತ್ತದೇ ಮೌನ ಅವಳ ಮೊಗದಲ್ಲಿ...
ಹಿಡಿತ ಬಿಗಿಯಾಗಿಸಿ, ನಾಭಿಗೆ ಬಿಸಿಯುಸಿರ ಸೋಕಿಸಿ,
ನಡುವ ಮಧ್ಯದಲಿ ಮುತ್ತೊಂದ ಮೆತ್ತಗೆ ಕೊಡಲು,
ನಾಚಿ ನುಡಿದಳು ನನ್ನಾಕೆ,
ನಿಲ್ಲಿಸೆಯಾ ಇನಿಯ ತುಂಟ ಬೆರಳಿನಾಟವನಿಂದು???

ನಿನ್ನಿನಿಯನಾಗಿ...

ಬೆಳಕಿರುವವರೆಗೂ ಜೊತೆಗಿರುವೆ ನಿನ್ನ ನೆರಳಾಗಿ,
ಕಡು ಕತ್ತಲಿನಲು ಬಳಿಯಿರುವೆ ತಂಗಾಳಿಯಾಗಿ,
ಸುಡುಬಿಸಿಲಿನಲು ಜೊತೆಗಿರುವೆ ಸುರಿವ ಬೆವರಾಗಿ,
ಕೊರೆವ ಚಳಿಯಲ್ಲಿ ಜೊತೆಗಿರುವೆ ಮೈ ಶಾಖವಾಗಿ,
ಜೊತೆಯಿರುವೆ ಗೆಳತಿ ನಿನ್ನಿನಿಯನಾಗಿ....

ನಿಂತು ಪಾದವು ಬಳಲಿದರೆ ನಾನಿರುವೆ ಪೀಠವಾಗಿ,
ದುಃಖ-ದುಗುಡಗಳಿರಲು ಮನದಲ್ಲಿ ನಾನಿರುವೆ ರಕ್ಷಕನಾಗಿ,
ದಿಕ್ಕು ತೋಚದೆ ನೀನಿರಲು ದಡ ಸೇರಿಸುವೆ ಅಂಬಿಗನಾಗಿ,
ಮುಪ್ಪು ಮೂಡಿರಲು ಕಂಗಳಲಿ ಮುನ್ನಡೆಸುವೆ ಸಾರಥಿಯಾಗಿ,
ಜೊತೆಯಿರುವೆ ಗೆಳತಿ ನಿನ್ನಿನಿಯನಾಗಿ....

ಸಾವಲ್ಲು ಜೊತೆಗಿರುವೆ ಗೆಳತಿ ತಿಳಿಯದೇತಕೆ ನಿನಗೆ..???
ಸುಟ್ಟರೆ ಸುಟ್ಟುಹೋಗುವೆ ನಿನ್ನೊಡನೆ ನಾ ಕಟ್ಟಿಗೆಯಾಗಿ,
ಹೂಳಲು ನಿನ್ನೂಡಲನ್ನು ಬಿಗಿದಪ್ಪುವೆ ಸಮಾಧಿಯ ಮಣ್ಣಾಗಿ,
ಜೊತೆಯಿರುವೆ ಗೆಳತಿ ನಿನ್ನಿನಿಯನಾಗಿ....

ನೆನೆಯಬೇಕೆನಿಸಿದೆ...

ನೆನೆಯಬೇಕೆನಿಸಿದೆ ಮನದಾಳದ ಕಣ್ಣೀರ ಮಳೆಯಲ್ಲಿ,

ಗುಡುಗು-ಸಿಡಿಳುಗಳೇ ತುಂಬಿವೆ ಎಲ್ಲ ಮೂಲೆಗಳಲ್ಲಿ,

ಕ್ಷಣದಲ್ಲೇ ಮರೆಯಾಗುವೆ ನೀನು ಆ ಮಿಂಚಲ್ಲಿ,

ಎಷ್ಟು ಗುಡುಗಿದರು ನೀರಿನ ಸುಳಿವಿಲ್ಲ ನನ್ನಲ್ಲಿ,

ಬತ್ತಿ ಬರಿದಾಗಿಸಿರುವೆ ಮುಳುಗಿಸಿ ಮರಳುಗಾಡಿನಲಿ,

ಅತ್ತು ಮರೆಯುವೆ ನಿನ್ನ, ಕರುಣಿಸೆ ಕಣ್ಣೀರನ್ನ,

ಯಾರಿಗೂ ತಿಳಿಸದಲೆ ನೆನೆಯುವೆನು ಸ್ವಾತಿ ಮಳೆಯಲ್ಲಿ,

ಅತ್ತ ನೀರಿನ ಹನಿ ಸೇರಿ ಸ್ವಾತಿ ಮಳೆ ಹನಿಗಳಲಿ,

ಮುತ್ತೊಂದ ಮಾಡಿವೆ ನಿನ್ನ ಹೆಸರಲ್ಲಿ,

ಹಾರದಲಿ ಪೋಣಿಸೆ ನಿನ್ನ ಹೆಸರಿನ ಆ ಮುತ್ತನ್ನ,

ತೆಗೆಯದಿರು ಹಾರವನು ನಿನ್ನ ಕೊರಳಿಂದ,

ಖುಷಿಯಲ್ಲಿ ಸಾಯುವೆನು ಗೆಳತಿ ನಿನ್ನ ನೆನಪಲ್ಲಿ,

ಮುತ್ತಾಗಿ ನಿನ್ನೆದೆಯ ಬಳಿಯಿರುವೆನೆಂಬ ಸತ್ಯದಿಂದ....

ಹನಿ...

ಮೊದಲ ಮಳೆಯ ಮೊದಲ ಹನಿಯೇ,
ಕೆನ್ನೆ ಮೇಲೆ ಕ್ಷಣವು ಹೊಳೆದು,
ಮನದ ಆಳಕೆ ಮೆಲ್ಲನಿಳಿದು,
ತೊದಲ ಪ್ರೀತಿಗೆ ಹುಟ್ಟು ನೀಡಿದೆಯಲ್ಲೇ,
ವಿವರಣೆಯನಾರು ಹೇಳ್ವರು ನನ್ನ ಪುಟ್ಟ ಮನಸಿಗೆ...

ಮನದೆ ಇಳಿದ ಮೊದಲ ಹನಿಯೇ,
ಮೊಳೆತ ಜೀವಕೆ ಉಸಿರ ನೀಡು,
ಉಸಿರಿಗೊಂದು ಹೆಸರ ಹೇಳು,
ಹೊಸ ಭಾವದ ಪಿಸು ಮಾತಿಗೆ,
ಸೋತಿರುವುದು ನನ್ನೆದೆಯು,
ಹೆಸರಿನ ಗಾಢಾರ್ಥ ಹೇಳು ನನ್ನ ಪುಟ್ಟ ಮನಸಿಗೆ...

ನಿನ್ನ ತುಟಿಯ ಜೇನ ಹನಿಯು,
ಸವಿಯುವಾಸೆ ಹಗಲಿರುಳು,
ಸೋತ ಎದೆಗೆ ಸ್ವಂತವಾಗಿ,
ಚಿಂತೆ-ಸಂತೆ ದೂರ ಮಾಡಿ,
ಅಂತರಾಳದೊಲವಿನಿಂದ,
ಮಧುವನದಲಿ ಮಧು ಉಣಿಸು ನನ್ನ ಪುಟ್ಟ ಮನಸಿಗೆ...

ಪ್ರೀತಿಯ ಓಲೆ...

ನಿನ್ನ ಮೊಗ ನೋಡಲಾರೆನು ನಾನು,
ದೂರವಿರು ನನ್ನಿಂದ...
ಕರಗಿ ಕೆಳಗಿಳಿಯೇ ಕಂಗಳಂಚಿಂದ
ಕಣ್ಣೀರ ಹನಿಯಾಗಿ ಮನದಾಳದಿಂದ....

ಕಣ್ಣ ಮುಚ್ಚಲು ನಾನು,
ನನ್ನೆದರು ನೀನು,
ಬೇಡವೆಂದೆಷ್ಟು ಸಲ ದೂಡಲಿ ನಿನ್ನ,
ಬೇಡನಂತೇಕೆ ಬೇಟೆಯಾಡುವೆ ನನ್ನ,
ಬೇಡಿಕೊಂಡರು ಕರುಣೆಬಾರದೆ ನಿನಗೆ???
ಬಿಡುಗಡೆಯ ನೀಡೆನಗೆ ಚೆಲುವೆ,
ನಿನ್ನ ಮೋಹ ಜಾಲದ ವ್ಯೂಹದಿಂದ....

ನೊಂದು ಬೆಂದಿರುವೆ ನಾನು,
ಇಂದು ನಾಳೆಗಳ ಅರಿವಿಲ್ಲದೆ,
ಒಂದುಸಲವಾದರು ಹೇಳು ಪ್ರೀತಿಯಲಿ,
"ನೀ ನನಗೆ ಇಷ್ಟ"ವೆಂದು.....
ಅಷ್ಟೇ ಸಾಕೆನ್ನ ಪುಟ್ಟ ಹೃದಯಕೆ,
ಎಷ್ಟೇ ಜನುಮಗಳೆ ಸಾಗಲಿ,
ಕಾಯುವೆನು ನಿನಗಾಗಿ ತೆರೆದ ಮನಸಿಂದ,
ಸೇರಿಕೊಳ್ಳವೆ ನಿನ್ನ ಮುಗ್ದ ಪ್ರೇಮದಿಂದ...